शिवसेनेने पेटवली शिवाजी चौकात मशाल; भरपावसात घोषणाबाजी, चिन्ह मिळाल्याचा व्यक्त केला आनंद

कोल्हापूर येथे शिवसेनेने शिवाजी चौकात भरपावसात मशाल पेटवली. 

कोल्हापूर : उष:काल होता होता, काळरात्र झाली, अरे, पुन्हा आयुष्याच्या पेटवा मशाली या गाण्याच्या पार्श्वभूमीवर शिवसेनेच्या उद्धव ठाकरे गटाने मंगळवारी सायंकाळी छत्रपती शिवाजी महाराज चौकात मशाल पेटवून चिन्ह मिळाल्याचा आनंद व्यक्त केला. नवमहाराष्ट्राच्या हिंदुत्वाची साथ, मनामनात पेटवू मशाल, उद्धव ठाकरे झिंदाबाद, आदित्य ठाकरे झिंदाबाद अशा घोषणा देत कार्यकर्ते आणि पदाधिकाऱ्यांनी शिवसेना उद्धव बाळासाहेब ठाकरे पक्षाला मशाल हे निवडणूक चिन्ह मिळाल्याचा आनंद व्यक्त केला. 

यावेळी शिवसेनेच्या वतीने मशालीच्या रूपातून कोल्हापुरातून हिंदुत्वाचा जागर प्रस्थापित करणार असल्याचे शिवसेनेचे या गटाचे जिल्हाप्रमुख विजय देवणे आणि संजय पवार यांनी सांगितले. प्रारंभी नेत्यांनी चौकातील शिवाजी महाराजांच्या पुतळ्यास पुष्पहार अर्पण करुन तेथील मशाल प्रज्वलित केली. यावेळी कार्यकर्त्यांनी आणलेल्या वीस मशाली पेटवून भरपावसात घोषणा देण्यात आल्या. यावेळी शहरप्रमुख रविकिरण इंगवले आणि हर्षल सुर्वे, माजी नगरसेविका प्रज्ञा उत्तुरे, स्मिता सावंत, दीपाली शिंदे, विष्णुपंत पोवार, धनाजी पाटील, मनजित माने, अवधूत साळोखे आदी उपस्थित होते.