शहरात अपुरा व कमी दाबाने पाणी पुरवठा

कोल्हापूर : कोल्हापूर शहराला पाणी पुरवठा करणाऱ्या शिंगणापूर व बालिंगाजवळील नदीपात्रातील पाण्याची पातळी कमी झाल्यामुळे पुढील दोन दिवस शहराला अपुरा व कमी दाबाने पाणी पुरवठा होणार असल्याची माहिती शहर पाणी पुरवठा विभागाने पत्रकाद्वारे दिली.

शिंगणापूर व बालिंगा येथे नदीतील पाणीपातळी कमी झाली आहे. त्यामुळे तेथील उपसा केंद्रातून पुरेशा प्रमाणात पाणी उपसा होत नाही. पाटबंधारे विभागाकडून राधानगरी धरणातून पाणी सोडण्यात आलेले आहे. तथापि सोडलेले पाणी पंचगंगा नदीपात्रामध्ये शिंगणापूर बंधारा येथे येण्यासाठी गुरूवारी दुपारपर्यंतचा कालावधी लागणार आहे.

त्यामुळे बुधवारी व गुरूवारी संपूर्ण कोल्हापूर शहर व त्याला संलग्नित उपनगरे, ग्रामीण भागातील नळ जोडणीधारकांना होणारा पाणी पुरवठा अपुरा व कमी दाबाने होईल तर काही भागात पाणी पुरवठा होणार नाही. बुधवारी शहरात अनेक भागात कमी दाबाने पाणी पुरवठा झाला. नागरिकांनी उपलब्ध पाणी काटकसरीने वापरून महानगरपालिकेला सहकार्य करावे, असे आवाहन महापालिकेच्या पाणी पुरवठा विभागाने केले आहे.