इमारतीवरुन पडून जखमी

लोकमत न्यूज नेटवर्क

कोल्हापूर : हातकणंगले तालुक्यातील पारगाव येथे इमारतीच्या बांधकामावरुन पडल्याने विजय दशवंत गायकवाड (वय २२ रा. पारगाव) हे जखमी झाले. ही घटना बुधवारी सकाळी घडली. घराशेजारी सुरु असलेले बांधकाम पाहण्यासाठी विजय गेला होता. त्यावेळी पहिल्या मजल्यावरुन तोल जाऊन तो खाली पडला. त्यांच्या डोक्याला गंभीर दुखापत झाली आहे, त्याच्यावर सीपीआर रुग्णालयात उपचार सुरु आहेत.

ट्रॅक्टर उलटून एक जखमी

कोल्हापूर : बेलेवाडी ते कोगनोळी मार्गावर भरधाव ट्रॅक्टर-ट्रॉली उलटली, या अपघातात मच्छिंद्र लक्ष्मण गुळगे (सध्या रा. कापशी ता. कागल. मुळ गाव- सोनपेठ जि. परभणी) हा गंभीर जखमी झाला. ही घटना बुधवारी सकाळी बेलेवाडी नजीक घडली. त्यांना गंभीर जखमी अवस्थेत सीपीआर रुग्णालयात उपचारासाठी दाखल केले आहे. अपघाताची नोंद सीपीआर पोलीस चौकीत झाली आहे.

गळफास घेतलेल्या विवाहितेचा मृत्यू

कोल्हापूर : राजारामपुरी तेरावी गल्लीतील आयमन इम्रान शेख (वय ३० रा. राजारामपुरी) या महिलेने दि. ८ मार्च रोजी सायंकाळी राहत्या घरी छतावरील सिलिंग फॅनच्या हुकाला ओढणीने गळफास लावून घेतला होता. त्यांना अत्यावस्थेत उपचारासाठी सीपीआर रुग्णालयात दाखल केले होते. उपचार सुरु असताना मंगळवारी रात्री उशिरा त्यांचा मृत्यू झाला. याची नोंद सीपीआर पोलीस चौकीत झाली आहे.