‘डीवायपी मॉल, सयाजी’चा ४ कोटी ६८ लाखांचा घरफाळा भरल्याचे स्पष्ट

कोल्हापूर : महानगरपालिकेचा गेल्या सात वर्षांपासून जवळपास पंधरा कोटी रुपयांचा घरफाळा चुकविल्याचा जाहीर आरोप झाल्यामुळे एका वेगळ्या कारणाने चर्चेत आलेल्या डीवायपी सिटी मॉलचा आतापर्यंत दोन कोटी ५५ लाख ३२५ रुपयांचा, तर ‘सयाजी हॉटेल’चा दोन कोटी १३ लाख १९ हजार ०६१ रुपयांचा घरफाळा भरल्याची बाब समोर आली आहे.

कोल्हापूरसारख्या श्रीमंत शहरातील नागरिकांच्या जीवनशैलीची साक्ष देणाऱ्या डीवायपी मॉल व हॉटेल सयाजी झालेल्या आरोपांमुळे वादात सापडले असून, व्यवस्थापनाने असेसमेंट करतेवेळी दिलेल्या कागदपत्रांची, तसेच कुळांसोबत झालेल्या भाडे करारांची चौकशी सुरू झाली आहे. त्यातून लवकरच सत्य बाहेर येईल, अशी अपेक्षा आहे.

सध्या गोकुळच्या निवडणुकीची धामधूम सुरू असून, या निवडणुकीत पालकमंत्री सतेज पाटील यांनी ग्रामविकास मंत्री हसन मुश्रीफ यांना सोबत घेऊन माजी आमदार महादेवराव महाडिक यांच्यासमोर मोठे आव्हान उभे केले आहे. गोकुळच्या निवडणुकीचे बिगुल वाजताच आरोपांच्या फैरी झडण्यास सुरुवात झाली. त्यातील पहिला आरोप हा डीवायपी ‘मॉल’वर झाला. मॉल व्यवस्थापनाने गेल्या सात वर्षांत महापालिकेचा पंधरा कोटी रुपयांचा घरफाळा चुकविला असल्याचा आरोप माजी खासदार धनंजय महाडिक यांनी केला. कूळ वापरातील इमारत असूनही मालक वापर दाखवून घरफाळा कमी लावून घेतला, कुळांबरोबर झालेले भाडे करार मॉल व्यवस्थापनाने महापालिकेला सादर केले नाहीत, असा महाडिक यांचा दावा आहे.

परंतु २०१४ सालात जेव्हा ही इमारत बांधून तयार झाली तेव्हा या इमारतीचे महापालिकेच्या घरफाळा विभागातील अधिकाऱ्यांनी असेसमेंट केले आणि त्याचा घरफाळा लागू केला. त्याची बिले २०१४ पासून २०२० सालापर्यंत माॅल व्यवस्थापनाला दिली. त्याप्रमाणे व्यवस्थापनाने तो घरफाळा धनादेशाद्वारे भरला आहे. कोणतीही थकबाकी नाही. त्याची नोंद महापालिकेच्या दप्तरी आहे. आतापर्यंत सर्व काही सुरळीत सुरू होते; परंतु धनंजय महाडिक यांनी तक्रार करताच मूळ कागदपत्रे, भाडे करारपत्र, भरलेला घरफाळा या सगळ्या गोष्टी समोर येऊ लागल्या आहेत.

‘सयाजी’नेही भरले २ कोटी १३ लाख-

डीवायपी सिटी मॉलच्या मागील बाजूला सयाजी हॉटेल असून, त्याचाही गेल्या सात वर्षांतील सुमारे २ कोटी १३ लाख, १९ हजार ०६१ रुपयांचा घरफाळा डी. वाय. पाटील हॉस्पिटॅलिटी प्रा. लि.तर्फे डायरेक्टर पृथ्वीराज संजय पाटील यांनी भरला आहे.

१. करदात्याचे नाव - संजय ज्ञानदेव पाटील

(डीवायपी सिटी मॉल)

सर्वे नंबर - २०१४/१५ , भू. क्र. १

असेसमेंट नंबर - २५१८१

साल भरलेली तारीख भरलेली रक्कम

२०१४-१५ ११.१२.२०१४ १६,०८,०८१

२०१६-१७ १८.०८.२०१६ ९, ९९,९९९

२०१६-१७ ०८.०९.२०१६ १०,००,०००

२०१६-१७ ३१.०३. २०१७ ७३,३२,२९८

२०१७-१८ ०८.१२.२०१७ ३८,८७,०४५

२०१७-१८ ११-१२-२०१७ १,२३,७२७

२०१८-१९ ३०-०६-२०१८ १ रुपया

२०१८-१९ ३०-०६-२०१८ ३६,९५,६३२

२०१९-२० ३०-०६-२०१९ ३७,२१,८४४

२०२०-२१ २५-०६-२०२० ३१,९४,९७३

एकूण २,५५,५४,३२५

२. करदात्याचे नाव - डी. वाय. पाटील हॉस्पिटॅलिटी प्रा. लि. तर्फे डायरेक्टर पृथ्वीराज संजय पाटील

सर्वे नंबर - २१०४/ १५ ,भू.क्र. १

असेसमेंट नंबर - २५१८२

साल भरलेली तारीख भरलेली रक्कम

२०१४-१५ ११-१२-२०१४ १०,६२,०४८

२०१५-१६ ०९-१२-२०१५ ३२,७९,५३१

२०१६-१७ २९-०८-२०१६ १६,०१,८४८

२०१६-१७ ०६-१२-२०१६ १६,०१,८४८

२०१७-१८ ३०-११-२०१७ २०,००,०००

२०१७-१८ ३१-०३-२०१८ ६,००,०००

२०१७-१८ ३१-०३-२०१८ ६,४२,४१४

२०१८-१९ २९-०९-२०१८ १६,१८,७३७

२०१८-१९ २६-१२-२०१८ १६,१७,९३२

२०१९-२० २०-०९-२०१९ १८,६६,१५३

२०१९-२० २४-१२-२०१९ १८,६६,१५२

२०२०-२१ २५-०६-२०२० ३००

२०२०-२१ २५-०६-२०२० ३५,४२, ०९९

एकूण - २,१३,१९,०६१

-प्रशासकांकडून चौकशी सुरू -

महाडिक यांनी केलेल्या आरोपानुसार, तसेच दिलेल्या पुराव्यानुसार प्रशासक डाॅ. कादंबरी बलकवडे यांनी त्याची चौकशी सुरू केली आहे. सहायक आयुक्त विनायक औंधकर यांना भाडे करारपत्र रजिस्ट्रार कार्यालयाकडून मिळविण्याचे, तसेच त्याची छाननी करण्याचे आदेश बलकवडे यांनी दिले आहेत; परंतु रजिस्ट्रार कार्यालयातील संबंधित अधिकारी रजेवर असल्यामुळे ही कागदपत्रे मिळण्यात अडचण झाली आहे.

दिवाकर कारंडे यांनी दिली नोटीस-

तत्कालीन करनिर्धारक व संग्राहक दिवाकर कारंडे यांनी डीवायपी सिटी मॉल व्यवस्थापनास नोटीस देऊन भाडे करारपत्राची मागणी केली होती. हे पत्र महापालिकेच्या रेकॉर्डला आहे; परंतु व्यवस्थापनाने करारपत्र दिली नाहीत. ती का दिली नाहीत, दिली असतील तर कोठे गेली हे प्रश्न यानिमित्ताने निर्माण झाले आहेत.