मराठा मोर्चासाठी कोल्हापूर सज्ज

इतिहास घडणार : गांधी मैदान येथून प्रारंभ

कोल्हापूर : साऱ्या महाराष्ट्राचे लक्ष लागून राहिलेल्या कोल्हापूरच्या सकल मराठा क्रांती मूक मोर्चाचा प्रारंभ गांधी मैदान येथून उद्या, शनिवारी सकाळी ११ वाजता होणार आहे. हा मोर्चा ऐतिहासिक ठरणार असल्याने त्यासाठी संपूर्ण यंत्रणा सज्ज असल्याची माहिती मोर्चा संयोजन समितीने पत्रकार परिषदेत दिली.
या नियोजनाबाबत माहिती अशी की, मोर्चाला गांधी मैदान येथून सकाळी ११ वाजता प्रारंभ होणार आहे. गांधी मैदानमध्ये राष्ट्रमाता जिजाऊ, महात्मा गांधी यांच्या पुतळ्याचे पूजन व जिजाऊवंदनानंतर मोर्चाची सुरुवात होणार आहे. याच वेळी सकाळी ११ वाजता गांधी मैदानसह ताराराणी चौक, तपोवन मैदान-शेंडा पार्क, कसबा बावडा (पॅव्हेलियन मैदान), शिवाजी विद्यापीठ परिसर येथूनही मोर्चाला प्रारंभ होणार आहे. गांधी मैदान येथून निघणाऱ्या मोर्चात प्रथम १० मुली अग्रभागी राहतील. त्या पूर्णपणे विशिष्ट गणवेशात राहतील. यांपैकी पाच मुलींच्या हाती क्रांतिज्योत असेल. या दहा मुलींना सुरक्षा कडे राहणार आहे. या मुलींच्या पाठीमागे महिला, महाविद्यालयीन युवक, पुरुष व त्यानंतर राजकीय नेते असा क्रम असणार आहे. या चार ठिकाणांहून निघणाऱ्या मोर्चातील अग्रभागी असणाऱ्या एकूण २५ हजार युवतींच्या हाती लहान-मोठे, तर सुमारे दोनशे महिलांच्या हाती भव्य मोठे झेंडे लक्ष वेधणार आहेत.


१४ स्क्रीनवर थेट प्रक्षेपण
संपूर्ण मोर्चा मार्गावर सूचना देण्यासाठी एफ. एम. यंत्रणा कार्यरत असून मोर्चाच्या संपूर्ण मार्गावर १४ भव्य एल. ई. डी. स्क्रीन उभारण्यात येणार आहे. या स्क्रीनवर मोर्चाचे थेट प्रक्षेपण दाखविण्यात येणार आहे. शिवाय दसरा चौकातील छत्रपती शाहू महाराज यांच्या पुतळ्यापासून दोन किलोमीटर अंतरापर्यंत सुमारे २०० ध्वनिक्षेपक लावण्यात येणार आहेत.
भाषण, निवेदन वाचनासाठी युवती
दसरा चौकात दुपारी एक वाजता एक युवती भाषण, एक युवती निवेदन वाचन, एक युवती राष्ट्रगीत म्हणणार, तसेच आणखी दोन युवती जादा उपस्थित राहणार आहेत. तत्पूर्वी, पाच युवती जिल्हाधिकाऱ्यांना निवेदन देणार आहेत. या युवतींची नावे गोपनीय ठेवण्यात आलेली आहेत.
मोर्चामागे राजकीय नेते
गांधी मैदान येथून निघणाऱ्या मोर्चाच्या सर्वांत मागे राजकीय व्यक्ती राहणार आहेत; तर सर्व खासदार, आमदार व आणखी राजकीय नेते हे मोर्चाच्या शेवटी वृषाली हॉटेल ते ताराराणी चौकापर्यंत येतील.
महामार्गावर दिशादर्शक नकाशे
राष्ट्रीय महामार्गावरून प्रामुख्याने नागरिकांची गर्दी शहरात येणार असल्याने महामार्गावर सांगली फाटा, गोकुळ शिरगावनजीक मावळे वाहनांसाठी दिशादर्शक नकाशे व फलक उभे करणार आहेत.
सोनतळी ते शिवाजी पूल केएमटी सेवा
शहरापासून किमान चार किलोमीटर अंतरावर सोनतळी येथे वाहन पार्किंग व्यवस्था असल्याने तेथे पार्किंग केलेल्या नागरिकांसाठी शिवाजी पुलापर्यंत नेण्यासाठी १५ केएमटी बसेसची सोय करण्यात आली आहे. याशिवाय पार्किंगच्या ३७ ठिकाणी ‘केएमटी’च्या २०० अधिकाऱ्यांसह, वाहतूक शाखेचे सुमारे २०० पोलिस कार्यरत राहणार आहेत.


चंद्रकांतदादांनी
मोर्चात सहभागी व्हावे
पालकमंत्री चंद्रकांतदादा पाटील यांनी निवेदन स्वीकारण्यावरून झालेला वाद संपुष्टात आला आहे. आमची सगळ््याच नेत्यांनी मोर्चात त्यांच्या-त्यांच्या भागात सहभागी व्हावे, अशी अपेक्षा आहे. त्यानुसार पालकमंत्री चंद्रकांतदादा पाटील यांनीही सन्मानाने मोर्चात सहभागी व्हावे, त्यास आमची हरकत असण्याचे कारण नाही, अशी अपेक्षा सकल मराठा समाजाच्यावतीने गुरुवारी व्यक्त करण्यात आली. त्यामुळे पालकमंत्री पाटील हे देखील मोर्चात सहभागी होण्याची शक्यता आहे.