न्यायाधीशांसमोर विवाहितेचा स्वत:च्या गळ्याला चाकू

सांगलीतील घटना; न्यायव्यवस्थेवर भ्रष्टाचाराचे आरोप

सांगली : पतीपासून घटस्फोट घेण्यासाठी न्यायालयात अर्ज दाखल केलेल्या मंगरुळ-चिंचणी (ता. खानापूर) येथील स्वाती महेश शिंदे (वय २६) या विवाहितेने चक्क न्यायाधीशांसमोरच स्वत:च्या गळ्याला चाकू लावून आत्महत्येचा प्रयत्न केला. न्यायाधीश, कर्मचारी व पोलिसांनी वेळीच धावपळ केल्याने पुढील अनर्थ टळला. सांगलीत पाचवे प्रथमवर्ग न्यायदंडाधिकारी यांच्या न्यायालयात सोमवारी सायंकाळी पावणेपाच वाजता ही घटना घडली.
न्यायालयात स्वाती शिंदे हिने पर्समधील चाकू काढून स्वत:च्या गळ्याला लावला व न्यायाधीशांना आत्महत्येची धमकी दिली. ‘तुम्ही भ्रष्ट आहात, तुमच्यावर व तुमच्या न्यायप्रक्रियेवर माझा विश्वास नाही’, असा आरोपही तिने केला. न्यायालयाने तिला तातडीने ताब्यात घेण्याचे आदेश दिले. त्यानुसार शहर पोलिसांनी तिला ताब्यात घेतले. तिच्याविरुद्ध रात्री उशिरा आत्महत्येचा प्रयत्न, न्यायालयाच्या कामात व्यत्यय व न्यायालयाचा अवमान केल्याचा गुन्हा दाखल करण्यात आला. याप्रकरणी न्यायालयात बंदोबस्तात असलेल्या महिला पोलिस शिपाई सुप्रिया शेडबाळे यांनी फिर्याद दिली आहे. संशयित स्वाती शिंदे हिला रात्रीच अटक करून काही तासानंतर जामिनावर सोडण्यात आले.
साळशिंगे (ता. खानापूर) येथील दुर्योधन जाधव यांची मुलगी स्वाती हिचा डिसेंबर २०१४ मध्ये मंगरुळ (चिंचणी)मधील महेश शिंदे यांच्याशी विवाह झाला आहे. तिचा पती महेश आॅस्ट्रेलिया येथे खासगी कंपनीत नोकरी करतो. विवाहानंतर दीड-दोन महिने स्वाती सासरी होती. त्यानंतर कौटुंबिक कारणावरुन मतभेद निर्माण झाल्याने ती माहेरी निघून गेली. नातेवाईकांनी मध्यस्थी करून मतभेद मिटविण्याचा प्रयत्न केला होता. पण स्वातीने सासरी जाण्यास नकार दिला. आॅगस्ट २०१६ मध्ये तिने पतीपासून घटस्फोट घेण्यासाठी सांगलीतील पाचवे प्रथमवर्ग न्यायदंडाधिकारी यांच्या न्यायालयात अर्ज दाखल केला होता. या अर्जावर दोन-तीन वेळा सुनावणी झाली. न्यायालयाने महेश व स्वाती या दाम्पत्यास समझोता करण्यास वेळ दिला होता. तरीही त्यांच्यातील भांडण न मिटल्याने समझोता झालाच नाही. स्वातीने सासरी जाण्यास न्यायालयाला स्पष्टपणे नकार देऊन घटस्फोटाचा निर्णय देण्याची मागणी केली होती.
सोमवारी (दि. ३० जानेवारी) घटस्फोटाच्या अर्जावर अंतिम सुनावणी होती. त्यामुळे स्वाती व महेश यांचे नातेवाईक सकाळपासून न्यायालयाच्या आवारात बसून होते. दुपारी प्रत्यक्षात सुनावणीला सुरुवात झाली. न्यायालयाने घटस्फोटाचा अर्ज निकाली काढलयानंतर महेश व स्वातीचे नातेवाईक न्यायालयातून बाहेर पडले. महेशचे नातेवाईक मंगरुळला (चिंचणी) जाण्यासाठी तेथून निघालेही होते. त्यानंतर सायंकाळी पावणेपाच वाजता स्वाती अचानक पुन्हा न्यायालयात गेली. न्यायालयात दुसऱ्या खटल्याचे कामकाज सुरू होते. स्वातीने न्यायालयास ‘मी पतीसोबत नांदायला तयार आहे’, असे सांगितले. यावर न्यायालयाने शिपायास तिच्या पतीला बोलावून आणण्यास सांगितले, पण पती व त्याचे घरचे निघून गेले होते. त्यामुळे स्वातीने अचानक पर्समधील चाकू काढून स्वत:च्या गळ्याला लावला. ‘तुम्ही भ्रष्ट आहात, तुमच्यावर व तुमच्या न्यायव्यवस्थेवर माझा विश्वास नाही’, असा आरोप करून आत्महत्येची धमकी दिली. या प्रकारामुळे न्यायालयात काही वेळ गोंधळ निर्माण झाला होता. (प्रतिनिधी)

पोलिस, कर्मचाऱ्यांची धावपळ
स्वातीने पर्समधील चाकू काढून चक्क न्यायाधीशांसमोर स्वत:च्या गळ्याला लावून आत्महत्येची धमकी दिल्याने न्यायालयातील कर्मचारी, शिपाई व पोलिसांची तारांबळ उडाली. तिला बोलण्यात गुंतवून महिला पोलिस कर्मचाऱ्यांनी तिच्याकडील चाकू काढून घेतला. तिला ताब्यात घेण्यात आले. तिला शहर पोलिस ठाण्यात नेण्यात आले. तिच्याविरुद्ध दाखल केलेले गुन्हे जामीनपात्र आहेत. तिला जामिनावर सोडण्याचा अधिकार पोलिसांना आहे. त्यामुळे पोलिसांनी रात्रीच तिला जामिनावर सोडले.