(सुधारित) एमबीबीएस प्रवेशाच्या नावाखाली लाखाचा गंडा

कोल्हापूर : कमी पैशात ‘एमबीबीएस’ला प्रवेश देतो, असे सांगून सुमारे एक लाख रुपयांना गंडा घालण्याचा प्रकार घडला. याप्रकरणी वसंत गणपती शेटे (रा. प्लॉट नं. ३६,३७. सरस्वती कॉलनी, बालिंगा रोड, कोल्हापूर) यांनी करवीर पोलीस ठाण्यात तक्रार दिली. त्यानुसार परराज्यातील दोघांवर गुन्हा नोंद करण्यात आला आहे.

पोलिसांनी दिलेली माहिती अशी की, वसंत शेटे यांनी आपल्या मुलीला एमबीबीएस करण्याचे स्वप्न पाहिले, त्यासाठी खर्चाचा ताळमेळ बसवत प्रवेशासाठीच्या जाहिरातींची माहिती घेत होते. त्याचेवेळी त्यांच्या मोबाइलवर ‘एमबीबीएस’ करिता ३० लाख रुपयांत प्रवेश, अशा वर्णनाच्या इंग्रजीतील जाहिरातीचा मेसेज आला. मेसेजमधील मोबाइल क्रमांकाची व्यक्ती सोहाना मॅडम यांना शेटे यांनी फोन करून ‘एमबीबीएस’ प्रवेशाबाबत चर्चा केली. चर्चेत सोहाना मॅडम यांनी दिलेल्या मोबाइल नंबरवर बिनयकुमार प्रशान यांच्याशी शेटे यांची चर्चा झाली. त्यावेळी बिनयकुमार प्रशान यांनी हा प्रवेश अहमदनगर अथवा नाशिकमधील महाविद्यालयात देण्याचे निश्चित झाले. प्रवेशासाठी तडजोड करून १२ लाख रुपये द्यावे लागतील मगच एमबीबीएसला प्रवेश देऊ असे सांगितले. त्यानुसार फिर्यादी शेटे यांना बिनयकुमार प्रशान यांनी एका बँकेच्या बीडासांशी (कटक) शाखेत आपल्या खात्यावर तातडीने एक लाख रुपये भरण्यास सांगितले. त्यानुसार शेटे यांनी आपल्या पत्नीच्या नावे बँक खात्यातून बिनयकुमार प्रशान यांच्या नावे पैसे जमा केले; पण त्यानंतरही एमबीबीएसचे प्रवेश न देता आणखी जादा पैशांची मागणी झाली. त्यावेळी फसवणूक झाल्याचे लक्षात येताच शेटे यांनी करवीर पोलीस ठाण्यात तक्रार दिली. त्यानुसार पोलिसांनी सोहाना मॅडम व बिनयकुमार प्रशान (रा. माचुर्ली, पो. सलेपूर, कटक, ओडिसा) यांच्यावर फसवणुकीचा गुन्हा नोंद झाला आहे.