‘नॅक’ मूल्यांकन समिती उद्या येणार
By लोकमत न्यूज नेटवर्क | Published: March 13, 2021 04:44 AM2021-03-13T04:44:53+5:302021-03-13T04:44:53+5:30
‘नॅक’ने गेल्या वर्षी मार्च-एप्रिलदरम्यान विद्यापीठाला भेट देऊन हे मूल्यांकन करण्याचे नियोजित केले होते. मात्र, कोरोनामुळे या नॅक समितीची भेट ...
‘नॅक’ने गेल्या वर्षी मार्च-एप्रिलदरम्यान विद्यापीठाला भेट देऊन हे मूल्यांकन करण्याचे नियोजित केले होते. मात्र, कोरोनामुळे या नॅक समितीची भेट वर्षभर लांबली. या वर्षी जानेवारीमध्ये या समितीने दि. १४ ते १७ मार्च दरम्यान मूल्यांकनासाठी विद्यापीठाला भेट देत असल्याचे कळविले. त्यानुसार विद्यापीठाने मूल्यांकनाची तयारी सुरू केली. अंतर्गत गुणवत्ता हमी कक्षाचे संचालक आणि विविध ३४ अधिविभागांच्या सादरीकरणाचा अहवाल तयार झाला आहे. विद्यापीठ परिसराची स्वच्छता, इमारतींच्या रंगरंगोटीचे काम पूर्ण झाले. विद्यापीठातील फूटपाथ, झाडांवर पट्टे मारणे, आदी कामे शुक्रवारी सुरू होती. कुलगुरू डॉ. डी. टी. शिर्के, प्र-कुलगुरू डॉ. पी. एस. पाटील, विज्ञान व तंत्रज्ञान शाखेचे अधिष्ठाता डॉ. आर. के. कामत, अंतर्गत गुणवत्ता हमी कक्षाचे संचालक डॉ. एम. एस. देशमुख यांनी विविध अधिविभागांना भेटी देऊन तेथील सादरीकरणाच्या ठिकाणांची पाहणी करून तेथील तयारी जाणून घेतली. डॉ. शिर्के यांनी शुक्रवारी या अधिविभाग आणि प्रशासनातील शिक्षकेतर कर्मचाऱ्यांशी संवाद साधून त्यांना काही सूचना केल्या.
चौकट
दोन टप्प्यांत मूल्यांकन
संख्यात्मक आणि विश्लेषणात्मक अशा दोन टप्प्यांमध्ये नॅक मूल्यांकन होणार आहे. त्यातील ७० टक्के संख्यात्मक माहिती ‘नॅक’ला सादर केली आहे. उर्वरित ३० टक्के विश्लेषणात्मक मूल्यांकनासाठी समिती विद्यापीठाला भेट देणार असल्याचे डॉ. देशमुख यांनी सांगितले.
फोटो (१२०३२०२१-कोल-नॅक तयारी ०१ व ०२) : नॅक मूल्यांकन समिती शिवाजी विद्यापीठात रविवारी येणार आहे. त्या पार्श्वभूमीवर मुख्य इमारतीच्या परिसरातील झाडांवर रंगाचे पट्टे मारण्याचे काम शुक्रवारी सुरू होते.
फोटो (१२०३२०२१-कोल-नॅक तयारी ०३ व ०४) : नॅक मूल्यांकन समिती शिवाजी विद्यापीठात रविवारी येणार आहे. त्यासाठी दूरशिक्षण केंद्राने या समितीसमोर सादरीकरणासाठीची तयारी पूर्ण केली आहे.