ई-कचऱ्याबाबत जनजागृती करणे गरजेचे : फरास

‘रोटरी’तर्फे ‘इलेक्ट्रॉनिक कचरा जागृती अभियान’

 आॅनलाईन लोकमत

कोल्हापूर, दि.२४ : सध्या जागतिक पातळीवर ई-कचऱ्याचा प्रश्न गंभीर बनला आहे. ई-कचरा ठेवायला जागा मिळत नाही, या वस्तू दररोजच्या कचऱ्यात सापडतात. ओल्या क चऱ्यात अशा वस्तू मिसळल्यामुळे त्याचा मानवी शरीरावर परिणाम होतो. शहरासह ग्रामीण भागासाठी हा प्रश्न गंभीर बनला आहे. याबाबत समाजात जागृती होणे गरजे आहे, असे प्रतिपादन महापौर हसिना फरास यांनी केले.

पेटाळा येथील राम गणेश गडकरी सभागृहात सोमवारी दुपारी रोटरी क्लब आॅफ करवीर, दि रोटरी करवीर चॅरिटेबल ट्रस्ट, न्यू एज्युकेशन सोसायटी, शिक्षण उपसंचालक विभाग, कोल्हापूर, महाराष्ट्र प्रदर्शन नियंत्रण महामंडळ, कोल्हापूर विभाग व महानगरपालिका यांच्या संयुक्त विद्यमानाने ‘इलेक्ट्रॉनिक कचरा जागृती अभियान’ कार्यक्रमात बोलत होते. अध्यक्षस्थानी पी.डी.जी. रोटरी डिस्ट्रिक्ट ३१७० चे डॉ. वासुदेव देशिंगकर होते.

महापौर फरास म्हणाल्या, ई-कचरा जळून किंवा जमिनीत पुरूनही नाश पावत नाही तसेच त्या उघड्यावरही कुठेही टाकून चालत नाही. ई-कचऱ्यामुळे पर्यावरणाची मोठी हानी होत आहे. त्यासाठी समाजात जागृती करणेच हाच एकमेव उपाय आहे. अध्यक्षीय भाषणात डॉ. देशिंगकर म्हणाले, पर्यावरण संबंधित या समस्येबाबत ‘रोटरी’च्या माध्यमातून जनजागृती सुरू आहे. ई-कचऱ्याचा मानवी आरोग्यावर विपरित परिणाम होतेच पण पर्यावरण संतुलन बिघडत आहे. याबाबत जनजागृती करून जास्तीत जास्त प्रमाणात ई-कचरा संकलित करणे हा उद्देश आहे. कारण यांचे योग्यप्रकारे पुनर्वापर झाला तरच हा प्रश्न सुटणार आहे.

ई-कचरा व प्लास्टिक जागृती अभियान अध्यक्ष एस. एन. पाटील म्हणाले, शहरातील महानगरपालिका तसेच खासगी शाळांतील विद्यार्थ्यांनी त्यांच्या घरामधील अडगळीतील,परिसरातील ई-कचरा आणून तो शाळेत जमा करायचा आहे. शाळांमधील हा ई-कचरा ‘रोटरी’च्यावतीने संकलित करून त्याचा योग्य पुनर्वापर करण्यासाठी देण्यात येणार आहे. गेली चार वर्षे शहरातील २५० शाळांमध्ये ‘ई-कचरा संकलन’ उपक्रम राबविला जाणार आहे. त्यामध्ये हजारो विद्यार्थी सहभागी होतात तरी विद्यार्थ्यांनी २९ जुलैपर्यंत घरातील ई-कचरा शाळेत जमा करावा.

यावेळी न्यू एज्युकेशन सोसायटीचे पी. एस. हेरवाडे यांनी मनोगत व्यक्त केले तर ई-कचरा व प्लास्टिक जागृती अभियानाचे सचिव प्रमोद चौगले यांनी उपक्रमाबाबत प्रेझेंटेशन देऊन आभार मानले. कार्यक्रमास रोटरी डिस्ट्रिक्टचे हृषीकेश केसकर, रोटरी क्लब आॅफ करवीरचे अध्यक्ष विशाल जांभळे यांच्यासह ‘रोटरी’चे पदाधिकारी मोठ्या संख्येने उपस्थित होते.