कुपोषणाने एकाही बालकाचा मृत्यू होऊ नये

कोल्हापूर : एकात्मिक बालविकास सेवा योजनेच्या पोषण अभियानांतर्गत बुधवारी ‘राष्ट्रीय पोषण महिन्याचा’ शुभारंभ जिल्हाधिकारी राहुल रेखावर यांच्या अध्यक्षतेखाली झाला. यावेळी अपर जिल्हाधिकारी किशोर पवार यांनी कुपोषणाने एकाही बालकाचा मृत्यू होऊ नये याची काळजी घ्या, अशा सूचना केल्या.

जिल्हाधिकारी कार्यालयात झालेल्या या कार्यक्रमास प्रांताधिकारी वैभव नावडकर, जिल्हा परिषदेच्या जिल्हा कार्यक्रम अधिकारी शिल्पा पाटील, ग्रामीण पाणीपुरवठा विभागाच्या उपमुख्य कार्यकारी अधिकारी प्रियदर्शनी मोरे तसेच प्रकल्प अधिकारी, जिल्हा पोषण समन्वयक उपस्थित होते.

यानंतर झालेल्या आढावा बैठकीत अपर जिल्हाधिकारी पवार म्हणाले, अंगणवाडीसेविका, मदतनीस, गरोदर स्त्रिया, स्तनदा माता यांचे प्राधान्याने लसीकरण पूर्ण करावे. बालकांना पुरेसा, दर्जेदार आहार नियमित मिळावा याची काळजी घ्या, सर्व बालकांची मोफत आरोग्य तपासणी करून यातील तीव्र आणि मध्यम कुपोषित, दुर्धर, दीर्घकाळ आजारी बालके शोधून त्यांच्यासाठी योग्य संदर्भसेवा व उपचार तसेच घरीच दर दोन तासांनी पौष्टिक आहार देऊन पोषण श्रेणीची देखरेख करा. या महिन्यात संबंधित विभागांनी समन्वयाने उपक्रम राबवून डॅशबोर्डवर नोंदी घ्याव्यात.

शिल्पा पाटील म्हणाल्या, कोरोनाच्या तिसऱ्या लाटेच्या पार्श्वभूमीवर सर्व गर्भवती स्त्रियांसाठी प्रत्येक सोमवारी ४ वाजता प्राथमिक आरोग्य केंद्रात स्पॉट रजिस्ट्रेशन करून लसीकरण करण्यात येत आहे. स्तनदा मातांसाठीही लसीकरण सुविधा देण्यात येत असून, या महिन्यात १०० टक्के गर्भवती स्त्रिया आणि स्तनदा मातांचे लसीकरण करण्याचे उद्दिष्ट असल्याचे सांगितले. प्रकल्प अधिकारी ज्योती पाटील यांनी आभार मानले.

----

तरंग सुपोषित महाराष्ट्राचा

पोषण जनजागृतीसाठी महिला व बालविकास विभागामार्फत ८०८०८०९०६३ हा क्रमांक जाहीर करण्यात आला असून, तो डायल केल्यास व्हॉटसॲपवर विविध पोषण, आरोग्य व आहार, कोविड उपाययोजना याची यादी पाठवली जाते. यात अपेक्षित विषय क्रमांक टाकल्यास विषयाची सर्व सखोल माहिती आणि व्हिडिओ पाठवले जातात. यातील माहिती व पौष्टिक पाककृती व्हिडिओ अद्ययावत होते. अधिकाधिक लोकांनी या सेवेचा लाभ घेण्यासाठी व्यापक प्रचार करण्याच्या सूचना अपर जिल्हाधिकारी किशोर पवार यांनी दिल्या.

---

फोटो नं ०१०९२०२१-कोल-पोषण महिना

ओळ : पोषण अभियानांतर्गत बुधवारी ‘राष्ट्रीय पोषण महिन्याचा’ शुभारंभ जिल्हाधिकारी राहुल रेखावर यांच्या हस्ते झाला. यावेळी जिल्हा कार्यक्रम अधिकारी शिल्पा पाटील यांच्यासह अधिकारी, कर्मचारी उपस्थित होते.

---