आता सामना डेंग्यू, चिकुनगुनियाशी, साडेचार हजार घरात तपासणी

कोल्हापूर : कोरोनासारख्या महामारीशी सामना करीत असलेल्या महानगरपालिका आरोग्य विभागाने आता शहरा डेंग्यू, चिकुनगुनियाची साथ पसरू नये म्हणून विविध उपाययोजना राबविण्यास सुरुवात केली आहे. कीटकनाशक विभागाकडून दैनंदिन औषध फवारणी, धूर फवारणीबरोबरच घराघरात जाऊन डास अळी तसेच कंटेनर सर्वेक्षण करण्यात येत आहे.

प्रशासक डॉ. कादंबरी बलकवडे यांनी दिलेल्या निर्देशाप्रमाणे संपूर्ण शहरात आरोग्य विभागामार्फत सर्वेक्षण करण्यात येत आहे. गुरुवारी शहरातील १४ प्रभागातील ४४३१ घरांचे सर्वेक्षण करण्यात आले. यामध्ये ६,८२६ कंटेनर तपासण्यात आले. यामध्ये डेंग्यूसदृश २०३ ठिकाणी डास अळी आढळून आल्या. यावेळी दूषित पाणी आढळलेल्या ठिकाणी ठिकाणी तत्काळ औषध फवारणी, धूर फवारणी करण्यात आली.

शहरातील औषध फवारणीसाठी ५० कर्मचाऱ्यांच्या मदतीने २८ स्प्रे पंप, १४ धुर फवारणी मशीनद्वारे ही मोहीम राबविण्यात आली. सर्वेक्षणात दूषित पाण्याच्या ठिकाणी असलेल्या टायरी जप्त करून पाण्याच्या ठिकाणी गप्पी मासे कर्मचाऱ्यांमार्फत सोडण्यात आले. यावेळी मुख्य आरोग्य निरीक्षक जयवंत पवार, सर्व वॉर्ड आरोग्य निरीक्षक, मुकादम व कर्मचारी उपस्थित होते.

शहरातील नागरिकांनी डेंग्यू, चिकुनगुनियाची लक्षणे आढळल्यास महापालिकेच्या आरोग्य विभागास अथवा शासकीय रुग्णालयाशी त्वरित संपर्क साधावा, असे आवाहन महापालिकेमार्फत करण्यात आले आहे.

-काय खबरदारी घ्यावी-

- सेप्टिक टँकच्या व्हेंट पाईपला जाळी बसवावी

- आठवड्यातून एक दिवस कोरडा दिवस पाळवा

- फ्रिजमधील डिफ्रॉस स्ट्रेमधील पाणी आठ दिवसातून एकदा रिकामे करावे

- घराजवळील रिकामे टायर, नारळाच्या करवंट्या, डबे इत्यादीमध्ये पाणी साचू देऊ नये