सशस्त्र हल्ल्याप्रकरणी एकजणावर गुन्हा दाखल

लोकमत न्यूज नेटवर्क,

कोल्हापूर : शिवाजी पेठेतील महाराष्ट्र हायस्कूलसमोर शुक्रवारी (दि. ४) रात्री पूर्ववैमनस्यातून झालेल्या हल्ल्याप्रकरणी संशयित लालू लोहार (पूर्ण पत्ता माहीत नाही) याच्यावर जुना राजवाडा पोलीस ठाण्यात शुकवारी गुन्हा नोंद झाला.

पोलिसांकडून मिळालेली माहिती अशी, शुक्रवारी रात्री झालेल्या या हल्ल्यात सुभाष पोपटराव देवकर (वय ४५, रा. बाबा जरगनगर ) हे जखमी झाले. याप्रकरणी त्यांचे मित्र रणजित श्रीपती कंदूरकर (३९, राऊत गल्ली, शिवाजी पेठ)यांनी पोलिसांत फिर्याद दिली. यात जखमी व संशयित यांच्यात यापूर्वी झालेल्या वादाच्या कारणावरून संशयित लालू याने सुभा देवकर यांच्यावर धारदार शस्त्राने डोक्यात व चेहऱ्यावर जिवे मारण्याच्या हेतूने हल्ला केला होता. यात देवकर गंभीर जखमी झाले. त्यांच्यावर सीपीआर रुग्णालयात उपचार सुरू आहेत. या प्रकरणी जुना राजवाडा पोलिसांनी संशयित लोहार याच्यावर गुन्हा दाखल केला आहे. या प्रकरणाचा तपास पोलीस उपनिरीक्षक योगेश पाटील करीत आहेत.