घोसरवाडचा एकजण अपघातात ठार

कुरुंदवाड : घोसरवाड (ता. शिरोळ) येथे पाचवा मैल-घोसरवाड मार्गावरून जाणाऱ्या मोटारसायकलला उसाने भरलेल्या ट्रॅक्टरने जोराची धडक दिल्याने मोटारसायकलवरील अनिल दत्तू कोळी (वय ५५, रा. पाचवा मैल, घोसरवाड) हा जागीच ठार झाला, तर बाहुबली कुमार जंगटे हा गंभीर जखमी झाला. रविवारी रात्री साडेनऊच्यासुमारास पाचमैल-घोसरवाड रस्त्यावर जमादार टेक येथे हा अपघात झाला. याप्रकरणी ट्रॅक्टरचालक शहाजी सुखदेव जाधव (रा. कोळवाडी, जि. बीड) याच्याविरोधात कुरुंदवाड पोलीस ठाण्यात गुन्हा दाखल करण्यात आला आहे. याबाबतची तक्रार कुमार दत्तात्रय तराळ यांनी कुरुंदवाड पोलिसांत दिली आहे. पोलिसांतून मिळालेल्या माहितीनुसार अनिल कोळी व बाहुबली जंगटे हे मोटारसायकल (क्र. एमएच ०९ सी झेड ४११५) वरुन घोसरवाडच्या दिशेने जात होते. याचवेळी घोसरवाडकडे भरधाव वेगाने जाणाऱ्या ट्रॅक्टर-ट्रॉलीने मोटारसायकलला पाठीमागून जोरात धडक दिल्याने रस्त्यावर डोके आपटल्याने कोळी यांचा जागीच मृत्यू झाला; तर जंगटे गंभीर जखमी असून, त्यांना उपचारासाठी रुग्णालयात दाखल करण्यात आले आहे. अपघातानंतर ट्रॅक्टरचालक वाहन सोडून पळून गेला. अधिक तपास पोलीस हेडकॉन्स्टेबल चव्हाण करीत आहेत.

फोटो - ०८०२२०२१-जेएवाय-०४-मृत अनिल कोळी