दोन दुचाकींच्या धडकेत एकाचा मृत्यू

कोल्हापूर : भरधाव वेगाने असणाऱ्या दोन दुचाकींची समोरासमोर धडक होऊन झालेल्या अपघातातील गंभीर जखमीचा उपचार सुरू असताना मृत्यू झाला. सरदार दगडू पाटील (वय ४३, रा. कुडित्रे, ता. करवीर) असे मृताचे नाव आहे. हा अपघात शुक्रवारी (दि. ११) रात्री कुडित्रे (ता. करवीर) येथे मुख्य रस्त्यावर टापचा आंबा नावाच्या कोपऱ्याला घडला. दुचाकीचालक शरद राजाराम कुंभार (३५, रा. कुडित्रे) याच्यावर करवीर पोलीस ठाण्यात गुन्हा नोंद झाला आहे.

पोलिसांनी दिलेली माहिती अशी की, सरदार पाटील व शरद कुंभार हे दोघे आपापल्या दुचाकीवरून भरधाव वेगाने जात असताना दोन्हीही वाहनांची समोरासमोर धडक झाली. या अपघातात सरदार पाटील हे गंभीर जखमी झाले. खासगी रुग्णालयात उपचार सुरू असताना त्यांचा मृत्यू झाला. या प्रकरणी दुचाकीचालक शरद कुंभार यांच्यावर करवीर पोलीस ठाण्यात गुन्हा नोंद झाला आहे.

(तानाजी)