पीककर्ज परतफेडीस जुलैअखेर मुदतवाढ

Agriculture Sector Kolhapur : राज्यातील शेतकऱ्यांना पीककर्ज परतफेडीस जुलैअखेर मुदतवाढ देण्याचा निर्णय राज्य सरकारने घेतला आहे. या निर्णयामुळे परतफेडीस महिन्याचा अवधी मिळणार असल्याने शेतकऱ्यांना दिलासा मिळाला आहे.

ठळक मुद्देपीककर्ज परतफेडीस जुलैअखेर मुदतवाढ राज्य सरकारचा निर्णय : शेतकऱ्यांना दिलासा मिळणार

कोल्हापूर : राज्यातील शेतकऱ्यांना पीककर्ज परतफेडीस जुलैअखेर मुदतवाढ देण्याचा निर्णय राज्य सरकारने घेतला आहे. या निर्णयामुळे परतफेडीस महिन्याचा अवधी मिळणार असल्याने शेतकऱ्यांना दिलासा मिळाला आहे.

राज्यातील जिल्हा मध्यवर्ती सहकारी बँका व व्यापारी बँकांच्या माध्यमातून शेतकऱ्यांना पीककर्ज पुरवठा केला जातो. मात्र, पीककर्ज परतफेडीची मुदत ही जूनअखेर असते. या मुदतीत कर्जाची परतफेड करणाऱ्या शेतकऱ्यांना डॉ. पंजाबराव देशमुख व्याज सवलत योजनेचा लाभ मिळतो. प्रोत्साहनपर व्याज सवलतीमुळे विकास संस्था व बँकांची वसुली चांगली होते.

मात्र, राज्यात कोरोनाच्या पार्श्वभूमीवर एप्रिल व मे २०२१ मध्ये उद्भवलेल्या परिस्थितीमुळे लागू केलेल्या टाळेबंदीच्या कालावधीत शेतकऱ्यांना शेतीमालाच्या विक्री व्यवस्थेत निर्माण झालेल्या अडचणी व साखर कारखान्यांकडून शेतकऱ्यांना अद्याप उसाची एफआरपी मिळाली नाही. या सगळ्या परिस्थितीचा विचार करता विकास संस्था व बँकांच्या वसुलीवर परिणाम झाला आहे.

यासाठी पीककर्ज परतफेड करण्यासाठी जुलै २०२१ अखेर मुदतवाढ देण्याचा निर्णय राज्य सरकारने घेतला आहे. या वाढीव मुदतीत पकी कर्जाची परतफेड करणारे शेतकरी सरकारच्या डॉ. पंजाबराव देशमुख व्याज सवलत योजनेचा लाभ मिळण्यास पात्र असणार आहेत.