चंदगड तालुक्यात ४१ ग्रामपंचायतींसाठी राजकीय खलबते

चंदगड : तालुक्यातील ४१ ग्रामपंचायतींच्या निवडणुकीचा कार्यक्रम जाहीर झाला आहे. ग्रामपंचायत निवडणुकीच्या निमित्ताने गावा-गावातील राजकीय वातावरण तापू लागले आहे. शासन सरपंचपदाचे आरक्षण निवडणुकीनंतर जाहीर करणार असल्याने निवडणुकीतील ईर्ष्याच कमी झाली आहे.

तालुक्यातील ४१ ग्रामपंचायतींच्या निवडणुका जाहीर झाल्यापासून गल्ली-बोळातील कार्यकर्त्यांनी कंबर कसली आहे. तालुक्यात राजकीय पक्षांपेक्षा गटाच्या राजकारणाला महत्त्व आहे. त्यामुळे इच्छुकांची भाऊगर्दी व वैयक्तिक भेटीगाठी घेऊन आपली भूमिका मतदारांपर्यंत पोहोचविण्याच्या हालचालींना वेग आला आहे.

आमदार राजेश पाटील यांच्या म्हाळेवाडी व माजी मंत्री भरमुअण्णा पाटील यांच्या बसर्गे, जि. प. सदस्य कल्लाप्पा भोगण यांच्या कोवाड, तर माजी सभापती शांताराम पाटील यांच्या धुमडेवाडी, माजी सभापती भरमाण्णा गावडे यांच्या हलकर्णीसह कालकुंद्री, राजगोळी बुद्रुक, मांडेदुर्ग, दाटे, हजगोळी, किणी, मलतवाडी, नांदवडे, शिनोळी व तुडये या राजकीयदृष्ट्या संवेदनशील गावांत निवडणूक होत असल्याने लोकप्रतिनिधींचीही प्रतिष्ठा पणाला लागली आहे.

तालुक्यात १५ वर्षांपूर्वी भरमू पाटील गट विरुद्ध नरसिंगराव पाटील गट अशी लढत व्हायची. कालांतराने दौलत कारखान्याच्या संघर्षातून गोपाळराव पाटील हे नवे नेतृत्व उदयाला आले. अलीकडच्या दशकात संभाजीराव शिरोलीकर, शिवसेना, स्वाभिमानी शेतकरी संघटना, अप्पी पाटील, शिवाजी पाटील असे नवे नेतृत्व उदयाला आले आहे. त्यामुळे ही निवडणूक चुरशीची होणार आहे. हजगोळी, हलकर्णी, होसूर, इब्राहिमपूर, कळसगादे, कानडी, करेकुंडी, केरवडे-वाळकुळी, किणी, मलतवाडी, मुगळी, नागवे-ईनाम, कोळींद्रे, नांदवडे, पुंद्रा, सुरुते, शिनोळी खुर्द, तुडये, चिंचणे, बुक्कीहाळ, देवरवाडी, ढोलगरवाडी, धुमडेवाडी, जांबरे, कौलगे, किटवाड, माडवळे, म्हाळेवाडी, पाटणे, सुंडी, तावरेवाडी, कालकुंद्री, कोवाड, राजगोळी बुद्रुक, मांडेदुर्ग, आसगाव, बसर्गे, बागिलगे, बोंजुर्डी, दाटे, दिंडलकोप, घुल्लेवाडी या गावांत निवडणुका होत आहेत.