जिल्ह्यातील प्रायव्हेट क्लासेस आजपासून सुरू होणार
By लोकमत न्यूज नेटवर्क | Published: September 3, 2021 04:23 AM2021-09-03T04:23:43+5:302021-09-03T04:23:43+5:30
कोल्हापूर : कोरोनाच्या दुसऱ्या लाटेमुळे गेल्या सहा महिन्यांपासून बंद असणारे कोल्हापूर जिल्ह्यातील प्रायव्हेट क्लासेस आज, शुक्रवारपासून पूर्ववत सुरू होणार ...
कोल्हापूर : कोरोनाच्या दुसऱ्या लाटेमुळे गेल्या सहा महिन्यांपासून बंद असणारे कोल्हापूर जिल्ह्यातील प्रायव्हेट क्लासेस आज, शुक्रवारपासून पूर्ववत सुरू होणार आहे. कोरोनाबाबतच्या नियमांचे पालन करत क्लासेस सुरू करण्यास जिल्हा प्रशासनाने परवानगी दिली आहे. या परवानगीनुसार इयत्ता नववी ते बारावीचे वर्ग भरणार आहेत. त्यामुळे क्लासेस चालक आणि तेथील शिक्षकांना दिलासा मिळाला आहे.
हॉटेल, सर्व दुकाने कोरोनाच्या नियमांचे पालन करत सुरू करण्यास जिल्हा प्रशासनाने गेल्या दोन महिन्यांपूर्वी परवानगी दिली. या धर्तीवर प्रायव्हेट क्लासेस सुरू करण्यास परवानगी देण्यासाठी जुलैपासून कोल्हापूर जिल्हा प्रायव्हेट क्लासेस टीचर्स असोसिएशनचा (केप्टा) पाठपुरावा सुरू होता. पालकमंत्री सतेज पाटील, जिल्हा प्रशासनाला असोसिएशनने निवेदने दिली होती. त्यावर जिल्हा प्रशासनाने दि. ३० ऑगस्ट रोजी प्रायव्हेट क्लासेसमधील इयत्ता नववी ते बारावीचे वर्ग शासनाच्या नियम आणि अटीनुसार सुरू करण्यास परवानगी दिली आहे. त्यानुसार जिल्ह्यातील सुमारे एक हजार क्लासेसमधील इयत्ता नववी ते बारावीचे वर्ग शुक्रवारपासून सुरू करण्यात येणार आहेत. परवानगी मिळविण्याबाबत पालकमंत्री पाटील, जिल्हा प्रशासनाचे मोलाचे सहकार्य लाभले, असे ‘केप्टा’चे उपाध्यक्ष प्रा. अतुल निंगुरे यांनी गुरुवारी सांगितले.
चौकट
एका बेंचवर एक विद्यार्थी
क्लासेसच्या वर्गात एका बेंचवर एक विद्यार्थी अशी बैठक असणार आहे. क्लासमधील शिक्षक, विद्यार्थी आणि कर्मचाऱ्यांनी सोशल डिस्टन्सिंगचे पालन आणि मास्क, सॅनिटायझरचा वापर करणे आवश्यक आहे. ताप, सर्दी, खोकला, आदी कोरोनासदृश लक्षणे असणाऱ्या विद्यार्थी, शिक्षक, कर्मचाऱ्यांना वर्गात प्रवेश देण्यात येऊ नये, अशा सूचना शासनाने केल्या आहेत.