उंदरगावच्या मनोहर भोसलेचा निषेध

वाघापूर : संत सद्गुरू श्री बाळूमामा यांच्या नावाने आर्थिक हितसंबंध जोपासणाऱ्या व बाळूमामा भक्तांची लूट करणाऱ्या सोलापूर जिल्ह्यातील उंदरगाव येथील मनोहर चंद्रकांत भोसले याचा आदमापूर ग्रामपंचायतीच्या वतीने मासिक सभेत धिक्कार व निषेध केला आहे. अशा लोकांवर कायदेशीर कारवाई करावी, असा ठराव सरपंच, ग्रामविकास अधिकारी यांच्या सहीने मंजूर करण्यात आला आहे.

मनोहर भोसले हे अलीकडे आपणच संत बाळूमामांचे शिष्य, अवतार, वंशज असल्याचे सांगून बाळूमामा भक्तांची दिशाभूल करत आहेत. अलीकडे त्यांच्याविषयी अनेक तक्रारी आल्या आहेत.

संत सद्गुरू बाळूमामा हे शिव-शेषाचे अवतार घेऊन धनगर कुळात जन्म घेऊन आदमापूर येथे समाधिस्त होऊनही भक्तांना आपल्या मेंढ्यारूपी कळपात अजूनही अस्तित्वाचा पुरावा देणारे सद्गुरू श्री बाळूमामा एकच आहेत. अध्यात्म, ध्यान, धारणा, भक्ती, श्रद्धा एकच आहेत. मात्र, काही अजाण अनादी काळापासून आपणच देव असल्याचे भासवून समाजाला फसवत आहेत. हे बाळूमामांच्या तत्त्वात बसत नाही. त्यांनी आपल्या संपूर्ण अवतार काळात कोणाकडूनही एक दाम घेतला नाही; परंतु मनोहर भोसले हा बाळूमामांच्या नावाने समाजाची आर्थिक लूट करत आहेत. त्यामुळे आम्ही ग्रामपंचायत आदमापूरच्या वतीने मनोहर भोसले याचा निषेध करत आहोत, असा उल्लेख निषेध ठरावात आहे.