दसरा चषक फुटबॉल स्पर्धेत पीटीएम ‘अ’ची दमदार आगेकूच, खंडोबा ‘ब’वर मात

सामन्यात पाटाकडील तालीम मंडळ ‘अ’ने ४-० अशा गोलफरकाने विजय मिळविला.

कोल्हापूर : छत्रपती शाहू स्टेडियमवर दसरा कप फुटबॉल स्पर्धेत सोमवारी झालेल्या सामन्यात पाटाकडील तालीम मंडळ ‘अ’ने खंडोबा तालीम मंडळ ‘ब’वर ४-० अशा गोलफरकाने मात करीत दमदार आगेकूच केली.प्रारंभापासून पाटाकडील तालीम मंडळ ‘अ’ने वर्चस्व राखण्याचा प्रयत्न केला. दुसऱ्याच मिनिटाला पाटाकडील तालीम मंडळ ‘अ’च्या अक्षय मेथे-पाटीलच्या पासवर धैर्यशील पवारची सोपी संधी वाया गेली. पाठोपाठ नवव्या मिनिटाला पाटाकडील तालीम मंडळ ‘अ’च्या सैफ हकिमच्या पासवर उत्सव मरळकरने हेडद्वारे गोल नोंदवत १-० अशी आघाडी घेतली. सामन्याच्या विसाव्या मिनिटाला धैर्यशील पवारने मैदानी गोल नोंदवत २-० अशी आघाडी घेतली. २४ व्या मिनिटाला रूपेश सुर्वेच्या पासवर नियाज पटेलने हेडद्वारे गोल करीत संघाचा तिसरा गोल नोंदविला. ३६ व्या मिनिटाला पाटाकडील तालीम मंडळ ‘अ’च्या हृषीकेश मेथे-पाटीलने गोल नोंदवत सामन्यात ४-० अशी भक्कम आघाडी घेतली. मध्यंतरापर्यंत सामन्यात पाटाकडील तालीम मंडळ ‘अ’ चार गोलफरकाने आघाडीवर होता.
उत्तरार्धात पाटाकडील तालीम मंडळ ‘अ’ने बचावात्मक खेळी केली, तर खंडोबा तालीम मंडळ ‘ब’कडून अजिज मोमीन, सम्राट पाटील, विशाल सासने यांनी आघाडी कमी करण्याचा प्रयत्न केला. मात्र, त्यांना अपयश आले. सामन्यात पाटाकडील तालीम मंडळ ‘अ’ने ४-० अशा गोलफरकाने विजय मिळविला.