तरुणीची छेडछाड; मामा-भाच्यास बेदम चोप

बसंत-बहार रोडवरील घटना : परिसरात तणाव

कोल्हापूर : शाहूपुरी बसंत-बहार रोडवर तरुणीची छेड काढल्याच्या रागातून नातेवाइकांनी खाद्यपदार्थ गाडी चालविणाऱ्या मामा-भाच्यास बेदम चोप दिला. यावेळी संतप्त नागरिकांनी खाद्यपदार्थ विस्कटून टाकले. ही घटना शनिवारी सकाळी साडेअकराच्या सुमारास घडली. यावेळी नागरिकांच्या हाताला हिसडा मारून छेड काढणाऱ्या भाच्याने तेथून पळ काढला. याप्रकरणी पीडित तरुणीच्या आईने शाहूपुरी पोलीस ठाण्यात विकी मुल्ल्या (वय १९) याच्या विरोधात फिर्याद दिली.
याबाबत पोलिसांनी सांगितले, शाहूपुरीतील हॉटेल सायबासमोर नारायण मुल्ल्या यांची ‘महालक्ष्मी’ खाद्यपदार्थांची गाडी आहे. त्यांनी ती नातेवाईक पुरंदर पुलाड (रा. नागाळा पार्क) यांना चालविण्यास दिली आहे. पुलाड यांचा भाचा विकेश मुल्ल्या हा दुपारनंतर खाद्यपदार्थांच्या गाडीवर असतो. शनिवारी याच परिसरात राहणारी तरुणी महावीर कॉलेजमधून घरी येत होती. यावेळी विकेश याने तिला वाटेत अडवून तिचा हात पकडून जबरदस्तीने दुचाकीवर बसवू लागला. यावेळी तिने त्याच्या हातून सुटका करीत घरी जाऊन आईला सांगितले. त्यानंतर तिची आई काही नातेवाइकांना घेऊन खाद्यपदार्थांच्या गाडीवर आली.
याठिकाणी उभ्या असलेल्या विकेश याला शिव्यांची लाखोली वाहत बेदम चोप दिला. यावेळी त्याने हिसडा मारून तेथून पळ काढला. त्यानंतर संतप्त नातेवाइकांनी त्याचा मामा पुलाड यांनाही बेदम चोप देत गाडीवरील खाद्यपदार्थ विस्कटून टाकले. त्यानंतर पीडित तरुणीच्या आईने विकेश मुल्ल्या याच्या विरोधात फिर्याद दिली. त्यानुसार त्याच्यावर विनयभंगाचा गुन्हा दाखल केला. (प्रतिनिधी)