बेळगावमधील मसाज सेंटरवर छापा

स्पा सेंटरमध्ये अवैधरीत्या महिलांशी संबंध ठेवण्यात येत असल्याची माहिती सायबर पोलिसांना मिळाली. या माहितीच्या आधारे सदर स्पा सेंटरवर पोलिसांनी छापा टाकून प्रकाश कन्नप्पा येळ्ळूरकर (वय २७, रा. मराठा कॉलनी, टिळकवाडी) आणि विनायक केदारी शिंदे (वय ३७, रा. मरगाई गल्ली, जुने बेळगाव) या दोघांना अटक केली आहे.

हाइट्स अपार्टमेंट येथे न्यू गेट वे स्पा अँड सलून नावावर हे मसाज सेंटर सुरू होते. दरम्यान या मसाज सेंटरमध्ये तीन महिलांशी संबंध ठेवण्याचा प्रकार उघडकीस आला. या तीन महिलांची सुटका सायबर पोलिसांनी केली आहे. दरम्यान पोलिसांनी या स्पा सेंटरमधील अनैतिक गोष्टींसाठी वापरण्यात येणारे साहित्यदेखील जप्त केले आहे. ऑनलाइन पद्धतीने ग्राहकांना आकर्षित करून स्पा सेंटरमध्ये अवैध गोष्टी सुरू असल्याची माहिती पोलिसांना मिळाली होती, अशी माहिती पोलीस उपायुक्त विक्रम आमटे यांनी दिली. सीईएन विभाग इन्स्पेक्टर गड्डेकर यांच्या नेतृत्वाखाली ही कारवाई झाली.