आज रंगोत्सव

कोल्हापूर : रंगपंचमीच्या पूर्वसंध्येला गुरुवारी शहरातील प्रमुख चौकांत रंग, पिचकारी खरेदीसाठी नागरिकांनी मोठी गर्दी केली होती. कोरोनाची दुसरी लाट येण्याची शक्यता सरकारकडून वर्तविली जात आहे. तरीसुद्धा रंगोत्सवाची जय्यत तयारी करण्यात युवावर्ग गुंतला होता.

मागील वर्षी कोरोनाचा कहर वाढल्यामुळे रंगपंचमी मोठ्या प्रमाणात साजरी झाली नाही. त्यामुळे अनेकांनी यंदाची रंगपंचमी मोठ्या उत्साहात साजरी करण्याचा मानस बाळगला होता. मात्र, पुन्हा कोरोनाची दुसरी लाट येण्याची शक्यता वर्तविली जात असल्यामुळे अनेकांनी सावध पवित्रा घेतला आहे. तरीसुद्धा बच्चेकंपनीच्या आग्रहाखातर पालकवर्गाने पिचकारी, कोरडे रंग, खाद्यरंग, नैसर्गिक रंग आदींची खरेदी जोरदार केली आहे. विशेष म्हणजे मागील वर्षी कोरोनामुळे साजरी न करता आलेली रंगपंचमी यंदा जोरात करण्याचा पवित्रा बच्चेकंपनीबरोबरच मोठ्यांनीही घेतला आहे. त्यामुळे शहरातील रंगांची दुकाने गुरुवारी दिवसभर गर्दीने ओसंडून वाहत होती. विशेष म्हणजे कोरड्या पिवडी रंगाच्या पोत्यांना अधिक मागणी होती. त्यामुळे शहरातील महानगरपालिका चौक, पापाची तिकटी, शिवाजी चौक, महाद्वार रोड, भवानी मंडप, ताराबाई रोड, पान लाइन, लक्ष्मीपुरी, राजारामपुरी आदी ठिकाणी रंग खरेदी करण्यासाठी रात्री उशिरापर्यंत बाजारात तरुणाईची गर्दी उसळली होती. दरम्यान, गुरुवारी शाळकरी विद्यार्थ्यांनी आज, शुक्रवारी शाळेला गुडफ्रायडेनिमित्त सुटी असल्यामुळे शाळेच्या परिसरात रंगपंचमी साजरी केली.

रंगीबेरंगी पिचकाऱ्यांसह रंग बाजारात

पाठीवरचा पंप, छोटा भीम, मोटू-पतलू, डोरेमॉन, सिनचॅन आदी पिचकाऱ्या बाजारात दाखल झाल्या आहेत. बाजारात पिचकाऱ्यांची किंमत २० पासून ५०० रुपयांपर्यंत होती. पॅकिंगप्रमाणे नैसर्गिक, रासायनिक, पर्यावरणपूरक, खाद्यरंगांची विक्री सुरू होती.

------------------------

पंचेचाळीस प्रकारच्या पाचशे किलो खाद्यरंगांची निर्मिती

चेहऱ्यासह पर्यावरणास कोणत्याही प्रकारची हानी न पोहोचविणाऱ्या, हवा व पाण्याचे प्रदूषण न करणाऱ्या अशा तब्बल ५०० किलो खाद्यरंगांची निर्मिती निसर्गमित्र संस्थेने केली आहे. नैसर्गिक रंगांसह कडीपत्ता, पालक, पुदिना, बीट, गाजर, टॉमेटो, शेंद्री यापासून ४५ प्रकारचे खाद्यरंग बनवलेले आहेत. स्वत:ही हे रंग बनवून नागरिकांनी वापरावेत, असे आवाहन निसर्गमित्र अनिल चौगुले यांनी केले आहे.

फोटो : ०१०४२०२१-कोल-रंगपंचमी ०१, ०२

ओळी : कोल्हापुरातील खासबाग परिसरातील शाळेच्या परिसरात मुलींनी आज, शुक्रवारी शाळेला सुटी असल्यामुळे गुरुवारीच रंगपंचमी साजरी केली.

फोटो : ०१०४२०२१-कोल-रंगपंचमी ०३,०४,०५,०६

ओळी : कोल्हापुरातील खासबाग परिसरातील एका शाळेच्या परिसरात विद्यार्थ्यांनी आज, शुक्रवारी शाळेला गुडफ्रायडेनिमित्त सुटी असल्यामुळे गुरुवारीच रंगपंचमी साजरी केली. (छाया : आदित्य वेल्हाळ)