वस्त्रनगरीत रंगपंचमी उत्साहात

इचलकरंजी : शहर परिसरात सप्तरंगांची उधळण करीत रंगपंचमी मोठ्या उत्साहात साजरी झाली. कोरोनाचे सावट असले तरी त्याकडे कानाडोळा करीत अनेक ठिकाणी सवाद्य रंगपंचमी खेळली. काही कोरड्या रंगांची उधळण करण्यात आली, तर काहीजण मोटारसायकलींवरून फिरून रंग उधळत होते.

कडक उन्हाचा तडाखा बसत असला तरी त्याची तमा न बाळगता तरुण-तरुणी मोटारसायकलींवरून गटागटाने फिरून एकमेकांना रंग लावत होते. अनेक ठिकाणी महिलांनीही सहभाग नोंदविला. दुपारच्या वेळी थोडा उत्साह मंदावला असला तरी दुपारनंतर पुन्हा जोर धरत रंगपंचमी साजरी करण्यात आली. त्यामुळे चौक व अनेक रस्ते रंगीबेरंगी बनले होते.

दरम्यान, काही अतिउत्साही तरुणांनी मोटारसायकलींवरून फिरताना हुल्लडबाजीचे प्रदर्शन घडविल्याने त्याविषयी नाराजी व्यक्त होत होती. पोलिसांनी ठिकठिकाणी नाकाबंदी केल्यामुळे वातावरण नियंत्रित राहिले.

फोटो ओळी

०२०४२०२१-आयसीएच-०१

तरुणींनी मोटारसायकलवरून फेरफटका मारीत रंगपंचमी साजरी केली.

०२०४२०२१-आयसीएच-०२

महाविद्यालयातील तरुण-तरुणींनी एकमेकांना रंग लावल्यानंतर त्यांना सेल्फी काढण्याचा मोह आवरला नाही.

०२०४२०२१-आयसीएच-०४

मोटारसायकलीवरून फिरून चौकात आल्यानंतर तरुणांनी आपल्या मित्राला रंग लावला.

०२०४२०२१-आयसीएच-०५

रंग लावून मोटारसायकलवरून फिरताना तरुणी.

सर्व छाया-उत्तम पाटील