जयसिंगपूर शाहूनगर परिसरातील अतिक्रमण काढा

जयसिंगपूर : येथील शाहूनगर जय महाराष्ट्र चौक ते शाळा नं. ९ येथील रस्त्याच्या दुतर्फा असलेले अतिक्रमण काढून रस्ता रूंदीकरण करण्यात यावे, अशा मागणीचे निवेदन नागरिकांच्यावतीने पालिकेला देण्यात आले. लवकरात लवकर हा रस्ता खुला करून अपघातापासून व अतिक्रमणांपासून नागरिकांना दिलासा द्यावा, अशीही मागणी यावेळी करण्यात आली.

निवेदनात म्हटले आहे की, शहरातील शाहूनगर परिसरातील या रस्त्यावर मोठ्या प्रमाणात गर्दी असते. रस्त्याच्या दोन्ही बाजूस नगरपालिकेच्या हद्दीत घराच्या पायऱ्या, पत्र्याचे शेड, कोबा, डिजिटल बोर्ड, दुकानाचे बोर्ड आदी ठेवल्यामुळे रस्त्यावरून ये-जा करत असताना वाहनधारकांना कसरत करावी लागत आहे. त्यामुळे अपघाताच्या घटनाही घडत आहेत. त्यामुळे या रस्त्यावरील अतिक्रमण तत्काळ हटवून रस्ता खुला करून नागरिकांना दिलासा द्यावा, अशी मागणी यावेळी करण्यात आली. निवेदनावर अक्षय बाबर, संतोष सावंत, सागर मादनाईक, शंकर नाळे, राजेंद्र सुतार, विजय नलवडे, अमोल पाटील, हर्षवर्धन कुन्ने यांच्या स्वाक्षऱ्या आहेत.