‘लोकमत’च्या हाकेला कडवी खोऱ्याचा प्रतिसाद

लोक, संस्था सहभागातून नदी स्वच्छतेचा निर्धार : आराखड्याकरिता कृती समितीची स्थापना-लोकमतचाप्रभाव

आंबा : लोकमतने ‘जीवनवाहिनी कडवीची मरणयातना’ या वृत्तमालिकेतून कडवी नदीची समृध्दी जपण्याची गरज मांडली होती. यास कडवी खोऱ्यातील संवेदनशील भूमिपूत्रांनी प्रतिसाद देत सोमवारी मलकापूर येथील नगरपालिकेच्या सभागृहात बैठकीचे आयोजन केले होते. अडीच तास चाललेल्या या बैठकीत नदीच्या पुनर्जीवनाला योगदान देण्याचा निर्धार करण्यात आला. नगराध्यक्ष अमोल केसरकर यांच्या अध्यक्षतेखाली ही बैठक झाली.
बैठकीत नदीची सद्य:स्थिती व भविष्यातील धोके नजरेसमोर ठेवण्यात आले. यावेळी पंचवीस गावातील शेतकरी, सेवाभावी संस्थेचे कार्यकर्ते व नगरसेवक यांनी नदीच्या स्वच्छतेबाबत कृतीआराखडा तयार करणारे मुद्दे मांडले. मोनेरा फाउंडेशनचे संस्थापक अजिंक्य बेर्डे व एम. आर. पाटील यांनी नदीचे महत्त्व व अभियानाची भूमिका मांडली.
भाजपचे राज्य सदस्य प्रवीण प्रभावळेकर म्हणाले, स्वच्छता अभियानात सरकारीस्तरावर निधी उपलब्ध करून प्रदूषण रोखण्यासाठी नगरपालिका प्रशासन व तरूण मंडळांच्या माध्यमातून जागृती केली जाईल. शेतकऱ्यांनी शेतीला पाणी देण्याचे काटेकोर नियोजन करण्याची गरजही त्यांनी मांडली.
नगराध्यक्ष अमोल केसरकर यांनी नदीकाठच्या शेतकऱ्यांची यादी
तयार करून स्वच्छता, प्रदूषण, याअनुषंगाने स्थानिक स्तरावर जावून आठवड्यात आराखडा बनवण्याचे धोरण मांडले. करूंगळे येथील तंटामुक्त समितीचे अध्यक्ष एन. बी. पाटील म्हणाले, करूंगळे परिसरात नदी, शिवार यातला फरक दिसत नाही. पावसाळ्यात शिवार पाण्याने भरलेले असते. दीड दशकापूर्वी पात्रात अढी काढून पाणी मिळवत होतो. आता धरणामुळे पाणी सहज उपलब्ध झाले आहे. मात्र, नदीच्या सुधारणांकडे दुर्लक्षच आहे.
उपनगराध्यक्ष दिलीप पाटील यांनी बॉक्साईट उद्योगातील पन्नासभर मशिन कार्यरत आहेत. त्यांच्या सौजन्यातून दररोज एक याप्रमाणे पन्नास दिवसांत दहा किलोमीटरपर्यंतची नदी स्वच्छता होवून जाईल. त्यासाठी प्राधान्याने प्रयत्न करीन, असे सांगितले.
हुंबवली येथील प्रगत शेतकरी अ‍ॅड.अरविंद कल्याणकर यांनी सोशल मीडियाद्वारे भूमिपूत्रांना संघटित करून स्वच्छता अभियानात सहभागी करून घेण्याचे सुचवले. बांबवड्याचे अमर पाटील यांनी कडवीच्या पाण्याची शुध्दता अबाधित ठेवण्याचे आवाहन केले. शेतकरी संघटनेचे गणेश महाजन व विकास देशमाने यांनी कडवीबरोबर शाळी नदीचा स्वच्छता अभियानात समावेश करावा. जल व मृदू संवर्धनाच्या शासकीय योजना राबवण्यास प्रयत्न करता येईल, असे स्पष्ट केले. आळतूरचे माधव कळंत्रे यांनी आळतूर ते निळे या दरम्यानच्या नदीपात्राचे खोलीकरण पाटबंधारे विभागाने केले नाही. त्याबाबत पाठपुरावा करण्याची मागणी केली. कडवी मध्यम प्रकल्पांतर्गत विकासातून केवळ पाच किलोमीटरपर्यंत
नदीचे रूंदीकरण, खोदकाम झाले. पुढील काम थांबले आहे, असे सांगितले. बैठकीप्रसंगी पालिकेच्या अग्निशमन विभागाचे कर्मचारी शाहीद मुल्लाणी यांचा वाढदिवस साजरा करून शुभेच्छा दिल्या.
स्वागत भाजपचे राज्य सदस्य प्रवीण प्रभावळेकर यांनी केले. प्रास्ताविक राजेंद्र लाड यांनी केले, एच. एस. पाटील यांनी सूत्रसंचालन केले. (वार्ताहर)



बैठकीतील मुद्दे असे : नदीची समृध्दी नव्याने जपताना लोकसहभागाचा मोठा वाटा घेतला पाहिजे. स्वच्छतेचे हे काम काटेरी मुकूट आहे. तो सर्वांनी आनंदाने स्वीकारून झपाटून कामाला लागावे, असे प्रभावळकर यांनी स्पष्ट केले.
सलग पाच दिवस वृत्तमालिका देऊन याप्रश्नी वाचा फोडल्याबाबत बैठकीत लोकमतच्या अभिनंदनाचा ठराव केला.
उपनगराध्यक्ष दिलीप पाटील यांनी स्वच्छता मोहिमेकरिता स्वत:चे फोकलॅड मशिन पाच दिवस मोफत देण्याचे जाहीर केले.
या अभियानाच्या जागृतीसाठी मोनेरा फाउंडेशन, डॉ. व्ही. टी. पाटील फाउंडेशन व एम. आर. पाटील यांचा युवक मंच पुढाकार घेणार आहेत.
कडवी आईच्या दूधाचे कर्ज तिला समृद्द करून फेडूया, अशी भावना निळ्याचे प्रयोगशिल शेतकरी अशोक कुंभार यांनी
व्यक्त केली.

स्वच्छता अभियान नियोजनात सहभागी कार्यकर्ते :
विश्वास पाटील (सह्याद्री विकास संस्था, आंबा) गणेश पाटील (केर्ले), संदीप पाटील (चांदोली माजी उपसरपंच), अरविंद कल्याणकर (हुंबवली), भास्कर कांबळे (ग्रा. पं. सदस्य घोळसवडे), रमेश कांबळे, इब्राहिम पन्हाळकर (धाऊडवाडा), शिराज शेख (शिवराजे मंडळ, लव्हाळा), सीताराम पाटील (धोपेश्वर देवस्थान समिती, जावली), संजय कांबळे (वारूळ), अमोल सुतार (वारूळ), एस. टी. पाटील (शिरगाव), नंदकुमार कोठावळे (वैश्य समाज सचिव, मलकापूर), मानसिंग कांबळे (नगरसेवक), एच. एस. पाटील (शाहूवाडी), विनायक हिरवे (शाहूवाडी शैक्षणिक व्यासपीठ), डी. आर. गुरव (पर्यवेक्षक, पाटबंधारे करंजोशी).




जागृती समिती व आर्थिक नियोजन समितीवर नियंत्रण ठेवणाऱ्या कृती समितीची नियोजन बैठकीत स्थापना झाली. सदस्य असे : प्रवीण प्रभावळेकर, अमोल केसरकर, दिलीप पाटील, राजेंद्र लाड, एन. बी. पाटील, गणेश महाजन, मिलिंद सबनिस, भास्कर कांबळे, शिराज शेख.