Kolhapur: गतिरोधकावरून रिक्षा उलटली; चालकाचा मृत्यू, इचलकरंजी-टाकवडे रोडवरील घटना

इचलकरंजी : इचलकरंजी-टाकवडे रोडवरील मोठ्या गतिरोधकावरून रिक्षा उलटून त्याखाली सापडून रिक्षाचालकाचा मृत्यू झाला. अक्षय अनिल शिंदे (वय २४, रा. अथणी, जि. बेळगाव) असे त्याचे नाव आहे. दरम्यान, या अपघातात पादचारी रावसाहेब नेजे (६५, रा. पि. बा. पाटील मळा) हेही जखमी झाले. याप्रकरणी गावभाग पोलिस ठाण्यात नोंद झाली आहे.

अधिक माहिती अशी, अथणी येथील अक्षय शिंदे हा आपली रिक्षा घेऊन नातेवाइकांना सोडण्यासाठी इचलकरंजीत आला होता. नातेवाइकांना सोडून बुधवारी (दि.८) रात्री तो टाकवडेमार्गे अथणीकडे परत जात होता. टाकवडे रोडवरील रामपुष्प लॉन परिसरात असलेल्या मोठ्या गतिरोधकाचा अंदाज न आल्याने त्याने ब्रेक मारण्याचा प्रयत्न केला असता त्याची रिक्षा उलटली. त्याचवेळी रस्त्यावरून निघालेल्या रावसाहेब नेजे यांनाही रिक्षाचा धक्का लागल्याने ते जखमी झाले. 

अपघातात गंभीर जखमी झाल्याने अक्षयला नागरिकांनी तातडीने इंदिरा गांधी सामान्य रुग्णालयात दाखल केले. परंतु, उपचारांपूर्वीच त्याचा मृत्यू झाला असल्याचे वैद्यकीय अधिकाऱ्यांनी सांगितले. याबाबतची वर्दी वैद्यकीय अधिकाऱ्यांनी गावभाग पोलिसांना दिली. अक्षय याच्या खिशात सापडलेल्या कागदपत्रांवरून ओळख पटली असून, याबाबतची माहिती त्याच्या नातेवाइकांना दिली.