वाकरेत शाळकरी मुलाची आत्महत्या

कोपार्डे : वाकरे (ता. करवीर) येथील सातवीत शिकणाऱ्या शाळकरी मुलाने राहत्या घरी दोरीने गळफास घेऊन आत्महत्या केली. आर्यन नवनाथ माने (वय १३) असे त्याचे नाव असून दुपारी तीन वाजता ही घटना घडली. घटनेची नोंद करण्याचे काम रात्री उशिरापर्यंत करवीर पोलिसांत सुरू होते.

अधिक माहिती अशी, आर्यनचे वडील नवनाथ अल्पभूधारक शेतकरी असून सेंट्रींगकाम करून घर चालवतात. मुलगा आर्यन श्रीराम हायस्कूल कुडित्रे येथे सातवी इयत्तेत शिकत होता. लॉकडाऊनबरोबर सुट्टी असल्याने तो घरी होता. गुरुवारी दुपारी एक वाजता वडील व घरचे बाहेर गेल्याचे पाहून आर्यनने घरच्या वरच्या मजल्यावर दोरीने तुळईला गळफास लावून घेतला. सायंकाळी घरच्यांना आर्यन दिसेना म्हणून शोध घेतला असता त्याने गळफास घेतल्याचे लक्षात आले. आर्यन हा एकुलता एक मुलगा होता. आत्महत्येचे कारण समजू शकले नाही. याबाबत करवीर पोलीस अधिक तपास करत आहेत.