दुसऱ्यांदा सुधारित : भगवे ध्वज, भगवे फेटे, गुढीची तयारी
By लोकमत न्यूज नेटवर्क | Published: June 5, 2021 04:18 AM2021-06-05T04:18:49+5:302021-06-05T04:18:49+5:30
कोल्हापूर : गेले दोन दिवस जिल्हा परिषद, पंचायत समित्यांमध्ये एक निराळीच लगबग सुरू ...
कोल्हापूर : गेले दोन दिवस जिल्हा परिषद, पंचायत समित्यांमध्ये एक निराळीच लगबग सुरू आहे. छत्रपती शिवाजी महाराजांनी राज्याभिषेक करून घेतलेल्या दिवशी म्हणजे रविवार, दि. ६ जून रोजी शिवस्वराज्य दिनानिमित्त गुढी उभारली जाणार असल्यामुळे या नियोजनाची धांदल पाहावयास मिळत आहे.
ग्रामविकासमंत्री हसन मुश्रीफ यांच्या संकल्पनेतून राज्याभिषेकदिनी जिल्हा परिषदा, पंचायत समित्या आणि ग्रामपंचायतींमध्ये गुढी उभारण्यात येणार आहे. सकाळी ९ वाजता सर्वत्र एकाच वेळी होणाऱ्या कार्यक्रमासाठी जिल्हा परिषदांमध्ये त्या-त्या जिल्ह्याचे पालकमंत्री उपस्थित राहणार आहेत. कोल्हापूरमध्ये पालकमंत्री सतेज पाटील यांच्या हस्ते गुढी उभारण्यात येईल.
यानिमित्ताने उभारण्यात येणारा भगवा ध्वज, गुढीची उंची, त्यावरील कलश या सगळ्यांची तयारी सुरू आहे. यासाठी ग्रामविकास विभागाने राजदंड म्हणजे गुढी कशी उभारावी, भगव्या ध्वजावर कोणती चिन्हे असावीत, याचे मार्गदर्शन केले असून, त्यानुसार तयारीसाठी सामान्य प्रशासनासह, बांधकाम विभागाची गडबड सुरू आहे. मुख्य कार्यकारी अधिकारी संजयसिंह चव्हाण हे जातीने या कार्यक्रमाच्या नियोजनवर लक्ष ठेवून आहेत.
०४०६२०२१ कोल झेडपी ०१
शिवस्वराज्य दिनानिमित्त उभारण्यात येणाऱ्या गुढीचे संकल्पचित्र.