विहिरीत ढकलण्याची धमकी देऊन अल्पवयीन मुलीवर अत्याचार, कोल्हापुरातील घटना

गळ्यात दगड बांधून विहिरीत ढकलून देण्याची तसेच पैशाचे आमिष दाखवून दोन अल्पवयीन मुलींवर लैंगिक अत्याचार केल्याच्या दोन वेगवेगळ्या घटना उघडकीस आल्या. या प्रकरणी पोलिसांनी दोघा संशयितांना अटक केली आहे.

कोल्हापूर : गळ्यात दगड बांधून विहिरीत ढकलून देण्याची तसेच पैशाचे आमिष दाखवून दोन अल्पवयीन मुलींवर लैंगिक अत्याचार केल्याच्या दोन वेगवेगळ्या घटना उघडकीस आल्या. या प्रकरणी शाहूपुरी पोलीस ठाण्यात सद्दाम शेख (वय २८) व करवीर पोलीस ठाण्यात नितीन तांबेकर (वय ३३) या संशयितांना अटक केली आहे.

रात्रीच्यावेळी दुकानात साहित्य आणण्यासाठी गेलेल्या १५ वर्षांच्या मुलीला दुचाकीवरून घरी सोडण्याचे सांगून संशयित सद्दाम शेख याने आपल्या गाडीवर बसवले, तिला निर्जन स्थळी नेऊन तिच्यावर अत्याचार करण्याचा प्रयत्न केला. संबंधित पीडितेने आरडा-ओरडा करत विरोध दर्शविला. त्यावेळी त्याने तिला गळ्यात मोठा दगड बांधून विहिरीत ढकलून ठार मारण्याची धमकी देऊन तिच्यावर अत्याचार केले. ही घटना डिसेंबर २०२१ मध्ये घडली.

करवीर तालुक्यातील एका गावात आई-वडील कामानिमित्त बाहेर गेल्याचा डाव साधून संशयित नराधम नितीन तांबेकर याने १४ वयाच्या अल्पवयीन मुलीला खाऊसाठी पैसे देण्याचे आमिष दाखवून अत्याचार केला. ऑक्टोबर २०२१ मध्ये हा प्रकार घडला.