शिरगावच्या वीर माता-पित्याची जगण्यासाठी फरफट : शासकीय मदत, लाभ घेऊन वीरपत्नी रमली नव्या संसारात

जम्मू-काश्मीरमधील अतिसंवेदनशील असणाऱ्या काळूचेक येथील लष्कराच्या छावणीवर दहशतवाद्यांनी केलेल्या बॉम्बहल्ल्यात शहीद झालेला शाहूवाडी तालुक्यातील शिरगावचा जवान विजय आनंदा सावंत यांच्या वीर माता-पित्याची फरफट सुरू आहे.

ठळक मुद्देगतीमंद मुलासह हालाखीचे जिणे; हक्कापासून ठेवले वंचीत

<p>दीपक जाधव ।
कोल्हापूर : जम्मू-काश्मीरमधील अतिसंवेदनशील असणाऱ्या काळूचेक येथील लष्कराच्या छावणीवर दहशतवाद्यांनी केलेल्या बॉम्बहल्ल्यात शहीद झालेला शाहूवाडी तालुक्यातील शिरगावचा जवान विजय आनंदा सावंत यांच्या वीर माता-पित्याची फरफट सुरू आहे.
या २३ वर्षांच्या जवानास १९ जुलै २००७ च्या रात्री वीरमरण आले. विजय सावंत हे सन २००२ मध्ये ११३ इंजिनिअरिंंग रेजिमेंटमधून जम्मू येथे दाखल झाले. शहीद झाले तेव्हा त्यांचे लग्न होऊन फक्त दोनच महिने झाले होते. संसार फुलण्याआधीच नियतीने त्यांच्यावर घाला घातला. त्यांच्या घरची परिस्थिती गरिबीची आहे. कुटुंबातील कमविता विजय शहीद झाल्याने कुटुंबावर डोंगर कोसळला. एखादा जवान देशासाठी शहीद झाला तर त्याच्या कुटुंबीयांना शासनाकडून आर्थिक मदत मिळते. मात्र, विजयचे लग्न झाले असल्याने ही मदत व शासकीय लाभ पत्नीला मिळाले. पत्नीने २०११ ला पुनर्विवाह केल्याने त्यांचे नवे आयुष्य सुरू झाले; परंतु त्यामुळे मूळचे सावंत कुटुंब उघड्यावर पडले. वडील व भाऊ गतिमंद व आईचे वय झाल्यामुळे त्यांनाही शेती किंवा उपजीविकेसाठी काम करता येत नाही. त्यांची ही परवड चुलतभाऊ सचिन सावंत यांनी ‘फेसबुक’च्या ‘आम्ही कोल्हापुरी’ ग्रुपवर शेअर केली. ती वाचून ‘लोकमत’ने त्यांच्या गावास भेट देऊन वस्तुस्थिती जाणून घेतली. विजयची पत्नी पूर्वी त्याच्या आई-वडिलांना महिन्याला पेन्शनमधील ३००० रुपये देत असे; परंतु कौटुंबिक वाद झाल्यानंतर गेली दोन वर्षे ही रक्कम मिळाली नसल्याचे आक्काताई सावंत यांनी सांगितले.
विजयच्या चुलत्यांनी कोल्हापुरातील सैनिक कल्याण कार्यालयात याबद्दल चौकशी केली; परंतु त्यांना तिथे कुणी दाद लागू दिली नाही. सध्या या कुटुंबाला शासकीय मदतीची गरज असून, ज्या वीर माता-पित्याने या भारतमातेसाठी मुलगा अर्पण केला, त्यांच्याच जगण्याची आज परवड होत आहे. त्यांना चुलते व त्यांची मुले थोडी मदत करतात; पण हक्काची मदत असताना दुसºयांकडे किती दिवस हात पसरायचे, असा प्रश्न त्यांच्या मनात आहे. शिरगाव हे पाच हजार लोकवस्तीचे गाव असून, प्रत्येक घरातील एक तरुण सैन्यात आहे.

नक्की मदत करू : सुभाष सासने
‘लोकमत’ने ही बाब जिल्हा सैनिक कल्याण अधिकारी मेजर सुभाष सासने यांना सांगितली. त्यांनी विजयच्या आई-वडिलांनी त्यासंबंधीची रीतसर तक्रार व आवश्यक कागदपत्रे दिल्यास पेन्शनची निम्मी रक्कम त्यांच्या खात्यावर जमा करण्यासाठी प्रयत्न करू,असे आश्वासन दिले.