वृत्तपत्र विक्रेते दिलीप मोरे यांचा प्रामाणिकपणा

कोल्हापूर : कोल्हापूर शहरातील वृत्तपत्र विक्रेते दिलीप मोरे यांना राजारामपुरी ते जवाहरनगर येथे वृत्तपत्र वाटप करताना शनिवारी सकाळी मिळालेले पैशांचे पाकीट त्यांनी प्रामाणिकपणे परत केले. या पाकिटामध्ये तीन एटीएम् कार्ड, आधार कार्ड, पॅन कार्ड व रोख ३२६० रुपये होते.

जवाहरनगर रोडवर सापडलेले पाकीट त्यांनी कोल्हापूर जिल्हा स्वाभिमानी वृत्तपत्र विक्रेता व एजंटस् असोसिएशनचे अध्यक्ष किरण व्हणगुत्ते यांच्याकडे दिले. हे पाकीट तपासून पाहिले असता संबंधित पाकीटधारक हे सिध्देश लोहार यांचे असल्याचे समजले. त्याच्याशी संपर्क साधून लोहार यांना हे पाकीट परत करण्यात आले.

मोरे यांना देऊ केलेले बक्षीस त्यांनी नम्रपणे नाकारले. यावेळी कोल्हापूर जिल्हा स्वाभिमानी वृत्तपत्र विक्रेता व एजंटस् असोसिएशन अध्यक्ष किरण व्हणगुत्ते, सुरेश ब्रम्हपुरे, सतीश दिवटे, अनिल चव्हाण, दाजी मोरे, संजय पवार उपस्थित होते.

२८०८२०२१-कोल-वितरण फोटो

वृत्तपत्र वाटप करताना रस्त्यात सापडलेले पैशांचे पाकीट परत केल्याबद्दल दिलीप मोरे यांचा कोल्हापूर जिल्हा स्वाभिमानी वृत्तपत्र विक्रेता व एजंटस् असोसिएशन अध्यक्ष किरण व्हणगुत्ते यांच्या हस्ते शनिवारी सत्कार करण्यात आला. यावेळी सुरेश ब्रम्हपुरे, सतीश दिवटे, अनिल चव्हाण, दाजी मोरे, संजय पवार उपस्थित होते.