सिंगल बातम्या

गडहिंग्लज : चंदनकूड (ता. गडहिंग्लज) येथील प्राथमिक शाळेच्या माजी विद्यार्थ्यांनी शाळेतील मुलांना पुस्तके आणि वह्या भेट दिल्या. राणी भेंडिगिरी, ज्योती पाटील, मंजुनाथ पाटील, बसवराज पाटील, सचिन भेंडिगिरी, सुहास पाटील, श्रीधर पाटील यांनी हा उपक्रम राबविला.

गडहिंग्लज तालुक्यातील ‘१९१ आशा’ आंदोलनात सहभागी

गडहिंग्लज : शासकीय सेवेत कायम करण्यासह विविध मागण्यांसाठी पुकारण्यात आलेल्या राज्यव्यापी बेमुदत संपात गडहिंग्लज तालुक्यातील १९१ आशा सेविकांनी व ६ गटप्रवर्तक सहभागी झाले होते. त्यामुळे कोरोनाकाळातील सेवेवर परिणाम झाला आहे.

निंगुडगे येथे रक्तदान शिबिर

गडहिंग्लज : निंगुडगे (ता. आजरा) येथे आमदार राजेश पाटील यांच्या वाढदिवसानिमित्त आयोजित रक्तदान शिबिरात ५५ पिशव्या रक्तसंकलन झाले. या वेळी जयवंतराव शिंपी, सपोनि बालाजी भांगे, नगरसेवक अभिषेक शिंपी, सरपंच कृष्णा कुंभार, उपसरपंच प्रमोद देसाई, सम्राट सरदेसाई आदी उपस्थित होते.

‘शिवराज’मध्ये मार्गदर्शन

गडहिंग्लज : येथील शिवराज विद्या संकुलात वाणिज्य विभाग व लोटस् ग्लोबल व्लेथ यांच्या संयुक्त विद्यमाने शेअर बाजार जनजागृती कार्यक्रम पार पडला. महेश चौगुले यांनी प्रास्ताविक केले. दीपक खेडेकर यांनी स्वागत केले.

या वेळी प्रा. श्रीकांता लहरी-सागा यांनी शेअर बाजार गुंतवणूक, पंकज मठकर यांनी गुंतवणुकीची माध्यमे, शेअर बाजारामधील भागांची खरेदी-विक्री, गुंतवणूक कशी व कुठे करणे याविषयी मार्गदर्शन केले ‘सेबी’च्या गुंतवणूक कार्यक्रमातंर्गत प्रा. के. थंगराज व प्रा. राहुल धवन यंनी ‘म्युचुअल फंड आणि पोर्टफोलिओ मॅनेजमेंट’ याविषयी मार्गदर्शन केले.

या वेळी संस्थाध्यक्ष किसनराव कुराडे, सचिव अनिल कुराडे, प्राचार्य एस. एम. कदम, बी. एम. जाधव, बियामा वाटंगी, नाझिया बोजगर आदी उपस्थित होते.

तनवडी ग्रामपंचायतीची १०० टक्के करवसुली

गडहिंग्लज : तनवडी (ता. गडहिंग्लज) येथील ग्रामपंचायतीने २०२०-२१ या वर्षातील घरफाळ्याची सलग तिसऱ्या वर्षी १०० टक्के वसुली झाली. याकामी सरपंच बसवराज आरबोळे, उपसरपंच सागर सुतार, ग्रामसेवक पी. एम. रावण यांच्यासह सदस्यांनी विशेष परिश्रम घेतले.

चंदगड आगाराची पुणे-मुंबई बसफेरी सुरू

चंदगड : चंदगड आगाराने कोल्हापूर, पुणे व मुंबई या बसफेऱ्या पूर्ववत सुरू केल्या. कोरोनाच्या पार्श्वभूमीवर गेल्या तीन-चार महिन्यांपासून या फेऱ्या बंद होत्या. चंदगड-बेळगाव बसफेऱ्यांसह ग्रामीण भागातील फेऱ्याही लवकरात लवकर सुरू करावेत, अशी प्रवाशांची मागणी आहे.