कौटुंबिक वादातून सख्ख्या भावाचा खून राजारामपुरीतील घटना : तीक्ष्ण हत्याराने भोसकले

कोल्हापूर : आईला सतत त्रास देत असल्याच्या कारणावरून तीक्ष्ण हत्याराने सख्ख्या भावाचा भोसकून खून केल्याची घटना आज (मंगळवार) रात्री राजारामपुरी येथील शाहूनगर येथे घडली. अमित मनोहर कलकुटकी (वय २२, रा. राजारामपुरी १४ वी गल्ली, शाहूनगर) असे खून झालेल्या तरुणाचे नाव आहे. घटनेनंतर संशयित विकी मनोहर कलकुटकी (वय १९) पसार झाला. दरम्यान, हा प्रकार समजताच घटनास्थळी राजारामपुरी पोलीस ठाण्याचे अधिकारी व कर्मचारी दाखल झाले. जखमी अवस्थेत अमितला सीपीआर रुग्णालयामध्ये आणले. मात्र, तो उपचारापूर्वीच मृत झाल्याचे डॉक्टरांनी सांगितले. याबाबत पोलिसांकडून मिळालेली माहिती अशी, अमित व विकी दोघे सख्ख्ये भाऊ असून शाहूनगर येथील नवशा मारुती मंदिराजवळ आईसमवेत राहतात. अमित हा आईला वरचेवर त्रास देत होता. यावरून दोघांच्यात वारंवार भांडणे होत असत. आज रात्री अमित घरी मित्रांसमवेत गप्पा मारत असताना अचानक तेथे विकी आला आणि त्याने थेट अमितच्या छातीवर धारदार शस्त्राने वार केले. यावेळी अमितच्या मित्रांनी विकीला अडविण्याचा प्रयत्न केला असता, त्यांच्यावरसुद्धा हल्ला करण्याचा विकीने प्रयत्न केला. त्यानंतर तेथून विकी पसार झाला. या प्रकाराची माहिती मित्रांनी पोलिसांना दिली. घटनास्थळी पोलीस निरीक्षक अमृत देशमुख सहकार्‍यांसमवेत आले. अमितला उपचारासाठी सीपीआरमध्ये नेले; परंतु तो उपचारापूर्वीच मृत झाला होता. अमित कलकुटकीचा खून झाल्याचे समजताच त्याच्या मित्रांनी सीपीआरमध्ये गर्दी केली होती. खुनाबाबत पोलीस माहिती घेत होते. या घटनेची नोंद रात्री उशिरा राजारामपुरी पोलीस ठाण्यात झाली आहे. (प्रतिनिधी)