घरफोडीत चोरट्याने पैशासोबत नेले चप्पल, बूट

कोल्हापूर : येथील वर्षानगरमध्ये संभाजी हौसिंग सोसायटीमध्ये चोरट्याने बंद घराचे कुलूप तोडून ५८ हजारांची घरफोडी केली. या घरफोडीत ४० हजारांच्या रोकडसह चांदीची नाणी आदी साहित्य लंपास केले. ही घटना सोमवारी घडली. याबाबत विक्रम नारायण सरनाईक (४१ रा. सध्या वर्षानगर. मूळ रा. वरुणतीर्थ वेश, शिवाजी पेठ.) यांनी चोरीची तक्रार राजारामपुरी पोलीस ठाण्यात दिली.

पोलिसांनी दिलेली माहिती अशी की, विक्रम सरनाईक हे शिवाजी पेठेतील मूळचे रहिवासी असले तरीही ते वर्षानगरात संभाजी हौसिंग सोसायटीत राहतात. सोमवारी सकाळी ११.३० ते रात्री ११.३० वाजेपर्यंत ते सहकुटुंब घरगुती कामामुळे बाहेर होते. रात्री घरी परतले त्यावेळी त्यांच्या घरी चोरी झाल्याचा प्रकार लक्षात आला. चोरट्याने त्यांच्या बंद घराचे कुलूप तोडून आत प्रवेश केला. आतील वरच्या मजल्यावरील बेडरूममधील लाकडी कपाटाचे दार उघडून आतील स्टीलच्या डब्यात ठेवलेली ४० हजारांची रोकड, १० हजारांची चांदीची नाणी, तसेच १० हजार रुपये किमतीचे शूज, २२०० रुपयांचा चपलेचा जोड, असा ५८ हजारांचा ऐवज चोरून नेला. याबाबत सरनाईक यांनी मंगळवारी राजारामपुरी पोलीस ठाण्यात चोरीची तक्रार दिली आहे.