टक्केवारी थांबवा, महापालिका वाचवा

कोल्हापूर : काही दिवसांपासून महापालिका कॉन्ट्रॅक्टर या व्हाॅट्सॲप ग्रुपवरील 'काम देताना जे ठरलंय ते करायचं, जास्त लांबड लावायची नाही' असा संदेश सगळीकडे व्हायरल झाला. या टक्केवारी प्रवृत्तीवर प्रकाशझोत टाकण्यासाठी येथील आम आदमी पार्टीतर्फे महापालिकेसमेार मंगळवारी अनोख्या पद्धतीने आंदोलन केलेे. प्रतिकात्मकपणे टक्केवारीची हंडी फोडून लक्ष वेधले. यावेळी टक्केवारी थांबवा, महापालिका वाचवा, अशा घोषणांनी परिसर दणाणून सोडण्यात आला.

महापालिकेच्या विकासकामातील टक्केवारीचे पितळच व्हॉट्सॲपवरील त्या संदेशावरून उघडे पडले आहे. महापालिकेतील टक्केवारी पद्धतीचा विरोध करण्यासाठी आम आदमी पार्टीने 'हंडी फोड' आंदोलन केले. दुपारी बाराच्या सुमारास 'आप'चे पदाधिकारी व कार्यकर्ते महापालिकेसमोर एकत्र आले. त्यांनी 'टक्केवारी थांबवा, महापालिका वाचवा', 'ढपला संस्कृती बंद झालीच पाहिजे', 'टक्केवारीत सामील असलेल्या कारभाऱ्यांचा धिक्कार असो' अशा घोषणा देण्यात आल्या. टक्केवारीची हंडी सजवून १८ टक्के असा उल्लेख त्यावर केला गेला होता.

याप्रसंगी ‘आप'चे पश्चिम महाराष्ट्र अध्यक्ष संदीप देसाई म्हणाले, तब्बल १८ टक्के रकमेच्या टक्केवारीचा उल्लेख असलेला व्हायरल संदेश गंभीर आहे. टक्केवारीत जनतेचा पैसा लुबाडून 'ढपला' संस्कृती रूढ करत शहराचे नाव बदनाम केले जात आहे. अशा प्रवृत्तीला वेळीच आळा घातला गेला नाही तर कोल्हापुरात एकही प्रकल्प पूर्णत्वास जाणार नाही. सन २००९ साली सुरू झालेली नगरोत्थान योजना, अमृत योजना, थेट पाईपलाईन योजना अशा अनेक योजना टक्केवारीमुळे अर्धवट राहिल्या. या प्रवृत्तीला आम आदमी पार्टी कायम विरोध करत राहील.

यावेळी आपचे युवा अध्यक्ष उत्तम पाटील, संतोष घाटगे, सूरज सुर्वे, मोईन मोकाशी, आदम शेख, विशाल वठारे, राज कोरगावकर, प्रथमेश सूर्यवंशी, मयूर भोसले, किशोर खाडे, विजय हेगडे, बसवराज हादीमनी, संतोष चलवदी, भाग्यवंत डाफळे, सुधाकर शिंदे, प्रकाश हरणे, विजय भोसले आदी उपस्थित होते.

फोटो : ३१०८२०२१-कोल- आप हंडी

कोल्हापुरातील महापालिकेसमोर मंगळवारी आपतर्फे टक्केवारीची हंडी फोडण्याचे अनोखे आंदोलन केले. यामध्ये संदीप देसाई, उत्तम पाटील, संतोष घाटगे, सूरज सुर्वे, मोईन मोकाशी, आदम शेख, विशाल वठारे, राज कोरगावकर, प्रथमेश सूर्यवंशी, मयूर भोसले आदी सहभागी झाले होते.