उपनगरातील जलकुंभ समस्यांच्या गर्तेत

वास्तव्यास असणाऱ्या नागरी वस्त्यांची पाण्याची गरज पूर्ण व्हावी, भविष्यात नव्याने निर्माण होणाऱ्या नागरी वस्त्यांची निकड दूर व्हावी यासाठी दक्षिण विधानसभा मतदारसंघातील उपनगरांत विविध योजनेअंतर्गत लाखो रुपये खर्च करून लाखो लिटर पाण्याची साठवण क्षमता असणारे महाकाय जलकुंभ उभारण्यात आले. यातील बहुतांश जलकुंभाना गळत्या लागल्या असून, जलकुंभांचे उभे सिंमेंटचे स्तंभ टाक्या संरक्षक कठडे, पायऱ्याची मोठी पडझड झाली आहे. मोठ्या नागरी वस्त्यांमध्ये उभे जलकुंभ धोकादायक ठरत आहेत. संरक्षक भिंतीअभावी जलकुंभ परिसराचा वापर ओपन बार, प्रेमीयुगलांचे अश्लील चाळे, पत्त्यांचे डाव यासाठी होत आहे.

उपनगरात वाढत्या अस्ताव्यस्त नागरिकरणामुळे प्रशासनाने शिंगणापूर पाणी योजना, शहर वाढीव पाणीपुरवठा योजना व अन्य योजनाअंतर्गत जलकुंभ उभारले. यातील बहुतांश जलकुंभांची देखभाल दुरुस्तीअभावी दुरवस्था झाली असून, स्वतंत्र निधी उपलब्ध नसल्याने दिवसेंदिवस समस्येत भर पडत आहे. २०१२ला क्रांतिसिंह नाना पाटील नगर चौकात २० लाख लिटर पाणी साठवण क्षमता असणारा जलकुंभ उभारला खरा, पण आजअखेर पाणी ना टाकीत पडले ना प्रभागातील नागरिकांना मिळाले, हे दुर्दैव.

उपनगरातील या जलकुंभांत बालिंगा, बावडा, कळंबा फिल्टर हाऊस, पुईखडी जलशुद्धिकरण केंद्रातील शुद्ध पाणी सोडले जाते. पुढे वितरण शाखेमार्फत ए, बी, वॉर्डला पाण्याचा खजिना, सीडी वॉर्डला कोकणेमठ, तर ई वॉर्डला राजारामपुरी व कावळानाका शाखेतून पाणी वितरण होते; पण ज्या महाकाय जलकुंभांमधून पाण्याचे वितरण होते त्यांच्या दुरवस्थेकडे प्रशासनाचे दुर्लक्ष झाले आहे.

उपनगरांतील जलकुंभांच्या सुरक्षिततेची व दर्जाची प्रशासनाकडून वारंवार तपासणी होत नसल्याने समस्येत भर पडत आहे. पाणीपुरवठा विभागात पुरेसे मनुष्यबळ नसल्याने पाणी सोडणे, गळत्या काढणे, दूषित पाण्याच्या तक्रारीचे निवारण ही कामे होत नाहीत. त्यामुळे उपनगरात मोठ्या नागरी वस्तीत दुरवस्था झालेल्या अवस्थेत उभे महाकाय जलकुंभ नागरिकांसाठी धोकादायक ठरू शकतात.

उपनगरांतील जलकुंभांची माहिती

जलकुंभाचे नाव स्थापनावर्ष पाणी साठवण क्षमता आपटेनगर १९६२ १५ लाख लिटर

फुलेवाडी २०१२ २० लाख लिटर

पुईखडी उंच टाकी २००८ ५ लाख लिटर

साळोखेनगर २००० १५ लाख लिटर

कळंबा फिल्टर हाऊस १९८५ १८ लाख लिटर

पाण्याचा खजिना जी एस आर १८८५ १० लाख लिटर

इ एन आर २००० १८ लाख लिटर जी एस आर शालिनी १८८५ १८ लाख लिटर

पद्मावती उद्यान २००० ५ लाख लिटर

जरगनगर २०१० १५ लाख लिटर शेंडा पार्क २००० १५ लाख लिटर

राजेंद्रनगर १९८५ १८ लाख लिटर

वैभव टेकडी भारती विद्यापीठ २०१७ ५ लाख लिटर टेंबलाईवाडी १९६५ ५ लाख लिटर टेंबलाईवाडी २००२ १५ लाख लिटर

चौकट

आपटेनगर जलकुंभाची कालमर्यादा संपली

१९६२ला उभारण्यात आलेल्या आपटेनगर जलकुंभाची कालमर्यादा संपल्याचा अहवाल प्रशासनास सादर करण्यात आला आहे. हा जलकुंभ कधी कोसळेल हे सांगता येत नाही. अमृत योजनेअंतर्गत हा जलकुंभ पडून नव्याने आपटेनगर पंपिंग स्टेशनलगत उभारण्यात येणार होता. राजेंद्रनगरातील जलकुंभाचे मजबुतीकरण करण्यात येणार आहे; पण कधी याचे उत्तर प्रशासनास ठाऊक.

प्रतिक्रिया माजी नगरसेवक राजू दिंडोर्ले

आपटेनगर जलकुंभाबाबतीत प्रशासनाने तत्काळ निर्णय घ्यावा यासाठी पाठपुरावा केला होता; पण आजही प्रश्न प्रलंबित आहे. उपनगरातील धोकादायक जलकुंभांबाबत दुरुस्तीसाठी निधी उपलब्ध करावा, मनुष्यबळ वाढवावे यासाठी प्रशासनाने तत्काळ लक्ष घालणे गरजेचे आहे.