नंदगाव येथे तरुणाची आत्महत्या

दिंडनेर्ली: नंदगाव (ता.करवीर) येथील उत्तम उमाजी शिंदे (वय २५ वर्षे) या तरुणाने गळफास घेऊन आत्महत्या केली. याबाबत घटनास्थळावरून समजलेली अधिक माहिती अशी की, उत्तम शिंदे यांचे नंदगाव व बाचणी (ता. कागल) येथे दोन्ही ठिकाणी गॅस शेगडी रिपेअरी व विक्रीची दुकाने असून, लॉकडॉऊनमुळे आज तो दुकानाकडे गेला नव्हता. त्याचे वडील व तो दुपारी दोघे सकाळी साडेअकराच्या दरम्यान नंदगाव ते एकोंडी रोड वरती असलेल्या स्वतःच्या शेतातून घरी जेवण्यासाठी आले. वडिलांना गाडीवरून दारातच सोडले व गोठ्यातून पाच मिनिटात जाऊन येतो, असे सांगून तो पुन्हा गोठ्याकडे गेला. गोठ्याच्या पाठीमागे असलेल्या छोट्याशा आंब्याच्या झाडाला दोरीच्या साह्याने गळफास लावून आत्महत्या केली.

अर्धा तास उलटूनही उत्तम न आल्याने वडिलांनी फोन केला. फोनला प्रतिसाद न मिळाल्याने वडील व शेजारचा मुलगा गोठ्याकडे गेले तेव्हा फोन वाजतो आहे, फोन उचलत नाही, असे लक्षात आल्यानंतर त्यांनी आसपास शोधाशोध केली तेव्हा गोठ्याच्या पाठीमागील बाजूस असलेल्या आंब्याच्या झाडाला गळफास लावलेल्या अवस्थेत उत्तमचा मृतदेह दिसून आला. यावेळी वडिलांनी आरडाओरड करून ग्रामस्थांना बोलविले. त्याच्या पश्चात भाऊ, आई, वडील, विवाहित बहीण असा परिवार आहे.