हाॅकी स्टेडियम चौकात तलवारहल्ला, एक जखमी

कोल्हापूर : येथील ध्यानचंद हॉकी स्टेडियम चौकात किरकोळ कारणावरून झालेल्या तलवारहल्ल्यात एक गंभीर जखमी झाला. उदय यादव (वय ४८, रा. जुनी शाहू बँक, मंगळवार पेठ) असे जखमी झालेल्या व्यक्तीचे नाव आहे.

घटनास्थळी मिळालेली माहिती अशी की, हॉकी स्टेडियम चौकातील खाऊ गल्लीत राजेंद्रनगरमधील काही गुंड प्रवृत्तीच्या युवकांनी गोंधळ घातला. खाऊ गल्लीतील काही व्यावसायिकांकडून धमक्या देऊन खाद्यपदार्थांवर ताव मारला. यावेळी येथील चायनीज व्यावसायिक सचिन पडळकर याने या गुंडांना विरोध केला. संबंधित गुंडाने राजेंद्रनगरमधील काही सहकाऱ्यांना तेथे बोलावून घेतले. काही वेळातच पाच ते सहा जण नंग्या तलवारी घेऊन हाॅकी स्टेडियम चौकात आले. त्यांनी परिसरात दहशत माजवली. यावेळी विरोध करणाऱ्या सचिन पडळकर याचा, हातात तलवार घेऊन पाठलाग केला. याचवेळी परिसरातील गॅरेजमध्ये काम करणारा उदय यादव हा तेथे आला. त्याने वाद सोडविण्याचा प्रयत्न केला असता, त्याच्यावरच या गुंडांनी तलवारहल्ला केल्याने तो गंभीर जखमी झाला. यामुळे परिसरात प्रचंड गोंधळ उडाला. जुना राजवाडा पोलीस तातडीने घटनास्थळी दाखल झाले. जखमीवर सीपीआरमध्ये प्राथमिक उपचार करून त्याला पुढील उपचारासाठी खासगी रुग्णालयात स्थलांतरित केले. दरम्यान, रात्री उशिरा राजेंद्रनगरातील हल्लेखोरांचा पोलीस शोध घेत होते.