अकरावीसाठी ‘विज्ञान’कडे कल

कोल्हापूर : कोरोनामुळे रोजगार, कौशल्याभिमुख अभ्यासक्रमांच्या प्रवेशाकडे दहावी उत्तीर्ण विद्यार्थ्यांचा अधिक ओढा असल्याचे यावर्षी दिसत आहे. त्यामुळे शहरातील विविध ३५ कनिष्ठ महाविद्यालयांतील इयत्ता अकरावीसाठी प्रवेश क्षमतेपेक्षा कमी विद्यार्थ्यांचे अर्ज दाखल झाले. त्यातही विज्ञान विद्याशाखेतून बारावीपर्यंतचे शिक्षण घेऊन पुढे वैद्यकीय, अभियांत्रिकी क्षेत्रात करिअर करण्याचा विचार विद्यार्थी, पालकांनी केला आहे. त्यामुळे यंदा अधिकतर विद्यार्थ्यांचा विज्ञान विद्याशाखेतून अकरावी करण्याकडे अधिक कल आहे. या विद्याशाखेतून पहिल्या फेरीत २१५६ विद्यार्थ्यांनी प्रवेशनिश्चिती केली आहे.

या समितीने पहिल्या फेरीतील प्रवेशासाठी ७३५६ विद्यार्थ्यांची निवड यादी जाहीर केली होती. त्यापैकी एकूण ४२११ विद्यार्थ्यांनी प्रवेश निश्चित केले आहेत. प्राधान्यक्रम दिलेले आणि हवे असणारे महाविद्यालय मिळाले नसल्याने उर्वरित ३१४५ जणांनी प्रवेश घेतले नाहीत. त्यामुळे रिक्त राहिलेल्या १०४६९ जागांवरील प्रवेशासाठी केंद्रीय समितीने दुसऱ्या फेरीची प्रक्रिया शुक्रवारी सुरू केली. त्याअंतर्गत नव्याने अर्ज करणे, अर्जात बदल करण्याची प्रक्रिया सुरू झाली. त्यामध्ये एकूण ८३६ विद्यार्थ्यांनी प्रवेशासाठी ऑनलाईन अर्ज दाखल केले. त्यात काहींनी नवीन अर्ज, तर काही विद्यार्थ्यांनी अर्जामध्ये बदल केले आहेत. दाखल झालेल्या एकूण अर्जांपैकी विज्ञान विद्याशाखेचे ५२० अर्ज, वाणिज्य मराठीचे ११२, वाणिज्य इंग्रजीसाठी १६३, कला मराठी माध्यमासाठी ३५, तर कला इंग्रजी माध्यमासाठी सहा अर्ज दाखल झाले आहेत. त्यांच्या छाननीची प्रक्रिया मंगळवारी पूर्ण झाली असून, निवड यादी तयार करण्याची प्रक्रिया सध्या समितीकडून सुरू आहे.

निवड यादीची उद्या प्रसिद्धी

प्रवेशाच्या दुसऱ्या फेरीची निवड यादी उद्या, शनिवारी (दि. २५) शिक्षण उपसंचालक कार्यालयाच्या संकेतस्थळावर ऑनलाईन प्रसिद्ध केली जाणार आहे. निवड यादीतील विद्यार्थ्यांनी त्या दिवसापासून मंगळवार (दि. २८) पर्यंत महाविद्यालयात जाऊन प्रत्यक्ष प्रवेश निश्चित करायचे केंद्रीय समितीचे सचिव सुभाष चौगुले यांनी सांगितले.

प्रतिक्रिया

वैद्यकीय, अभियांत्रिकी, आदी क्षेत्रात करिअर करता येईल असा विचार पालक, विद्यार्थी करीत आहेत. त्यामुळे यावर्षी अधिकतर विद्यार्थ्यांचा विज्ञान विद्याशाखेकडे कल असल्याचे दिसून येत आहे.

-पी. एस. जाधव, उपप्राचार्य, कमला कॉलेज

आकडेवारी दृष्टिक्षेपात

एकूण प्रवेश क्षमता : १४६८०

समितीकडे दाखल अर्ज : ९८१०

प्रवेशासाठी पात्र अर्ज : ९७२६

व्यवस्थापन कोट्यांतर्गत प्रवेशित विद्यार्थी : ३६६

पहिल्या फेरीत प्रवेशासाठी निवड झालेले विद्यार्थी : ७३५६

या फेरीत प्रवेश निश्चित केलेले विद्यार्थी : ४२११

दुसऱ्या फेरीत प्रवेशासाठी असणारे विद्यार्थी : ५२७८

पहिल्या फेरीतील प्रवेशनिश्चिती

विज्ञान : २१५६

वाणिज्य मराठी : ७५४

वाणिज्य इंग्रजी : ६२९

कला मराठी : ६२२

कला इंग्रजी : ५०