कोल्हापूर : टेंबलाईवाडी येथील बेपत्ता महिलेचा भोगावती नदीपात्रात मृतदेह सापडला

कोपार्डे -कोल्हापूर- गगनबावडा रस्त्यावर असलेल्या बालिंगे पुलाजवळ भोगावती नदीपात्रात महिलेचा मृतदेह सापडला.ऋतुजा स्वप्निल कांबळे (वय २२) रा. लक्ष्मी कॉलनी,टेंबलाईवाडी, कोल्हापूर असे या महिलेचे नाव असल्याचे राजारामपुरी पोलीस ठाण्यात नोंदवलेल्या वर्णनावरून समोर आल्याने तिच्या नातवाईकांना बोलावून करवीर पोलिसांनी खातरजमा केली.पती स्वप्नीलने मृतदेह ऋतुजाचा असल्याचे सांगितले. या घटनेची नोंद करवीर पोलिसांत झाली आहे. 

 याबाबत मिळालेली माहिती अशी बालिंगा पुलाजवळ भोगावती नदी पात्रात नागदेववाडी येथील कांही युवक शनिवारी सायंकाळी चारच्या सुमारास पोहायला गेले होते. त्यांना महिलेचा मृतदेह नदीत पाण्यावर तरंगताना दिसला. याची माहिती बालिंगा पोलीस पाटील सुरेश पाटील यांना देण्यात आली. त्यांनी याची माहिती करवीर पोलिसांना दिली.

 करवीर पोलिसांनी जागेवर येऊन पंचनामा केला.राजारामपुरी पोलीस ठाण्यात गुरुवारी( दि. २९) रोजी लक्ष्मी कॉलनी टेंबलाईवाडी येथून ऋतुजा कांबळे ही पहाटे साडेचार वाजल्यापासून बेपत्ता असल्याची फिर्याद पती स्वप्निल तानाजी कांबळे याने दिली होती. फिर्यादितील वर्णना प्रमाणे या महिलेची वेशभूषा असल्याने ओळख पटवण्यासाठी  ऋतुजाचा पती स्वप्नील व नातेवाईकांना करवीर पोलिसांनी बोलावून घेतले. स्वप्नीलने मृतदेह ऋतुजा असल्याचे ओळखले. करवीर पोलिसांनी पंचनामा करुन मृतदेह उत्तरिय  तपासासाठी शासकीय रूग्णालयात पाठवला असून पोलीस या प्रकरणी अधिक तपास करत आहेत.