Kolhapur: खानापुरात कुटुंबातील तिघांना बांधून घालून घातला दरोडा, चोरट्यांनी २२० डुकरे पळवली

सदाशिव मोरे

आजरा : खानापूर पैकी रायवाडा (ता. आजरा) येथे एकाच कुटुंबातील तिघांना दोरीने बांधून घालून अज्ञात २० ते २५  जणांच्या टोळीने दरोडा घातला. यामध्ये चोरट्यांनी सोन्या-चांदी, काजूगर व रोख रक्कमेसह याॅकशार्क प्रकारची २२० पाळीव डुकरे पळवली आहेत. ही घटना रात्री दोनच्या सुमारास चिरका नावाच्या शेतात घडली.

चोरट्याने रात्री दहशत माजवत दरवाजे तोडले. प्रल्हाद राजाराम गुरव, पुनम प्रल्हाद गुरव व राजेश प्रल्हाद गुरव या तिघांना मारहाण करीत बांधून घातले. तोंडाला बांधल्यामुळे त्यांना आरडाओरडाही करता आला नाही. यावेळी चोरट्यांनी २० लाखांची २२० पाळीव डुकरे, १ लाख ५० हजार किमतीचा २०० किलो काजूगर, ४ लाख २० हजारांचे ७ तोळे सोने, १ लाख ५० हजारांचे १५ किलो चांदी व रोख रक्कम ३० हजार, दोन मोबाईल यासह अन्य घरगुती अंदाजे ३० लाखांचा ऐवज लंपास केला आहे. 

चोरट्यानी केलेल्या मारहाणीत प्रल्हाद गुरव, पूनम गुरव व राजेश गुरव जखमी झाले. घटनेची माहिती मिळताच पोलिस श्वान पथकासह घटनास्थळी दाखल झाले. मात्र श्वान घराभोवतीच घुटमळले. स्थानिक गुन्हे अन्वेषण शाखेचे पथक अधिक तपास करीत आहेत.