खवले मांजर तस्करीतील तिघांना पोलीस कोठडी

खवले मांजराची तस्कराची आणि वनविभागाच्या कर्मचाऱ्यांवर हल्ला प्रकरणातील संशयित तिघांना येथील प्रथम वर्ग न्यायदंडाधिकाऱ्यांनी तीन दिवसांची पोलीस कोठडी सुनावली. याप्रकरणातील अन्य संशयित तिघांचा पोलीस कसून शोध घेत आहेत.

शुक्रवारी (१६) सायंकाळी सव्वा पाचच्या सुमारास चंदगड-गडहिंग्लज मार्गावरील महागावनजीकच्या उंबरवाडी फाट्यावर खवल्या मांजराच्या विक्रीचा व्यवहार सुरू असताना मानद वन्यजीव रक्षक रोहन भाटे यांच्यासह पथकातील वनकर्मचाऱ्यांवर जीवघेणा हल्ला करण्यात आला होता. तसेच गडहिंग्लजपर्यंत पाठलाग करून जप्त केलेले खवल्या मांजर काढून घेण्याचा प्रयत्न तस्करांनी केला होता.

दरम्यान, याप्रकरणी पोलिसांनी ताब्यात घेतलेले अशोक भरमा फडके व राणोजी परसू शिंदे (दोघेही रा. उंबरवाडी, ता. गडहिंग्लज) व माणिक सागर देसाई (रा. सुळे, ता. आजरा) या तिघांना आज न्यायालयाने पोलीस कोठडी सुनावली.

अन्य संशयितांपैकी आनंदा राजगिरे (लिंगनूर, ता. कागल), प्रमोद पताडे (किणे, ता. आजरा), अमर नारायण कानडे (सिरसंगी, ता. आजरा) यांच्यासह इतर अनोळखी आरोपींचा पोलीस शोध घेत आहेत. पोलीस निरीक्षक प्रकाश गायकवाड अधिक तपास करीत आहेत.