गणेशोत्सवामुळे ट्रॅव्हल्सची भाडेवाढ; पुण्यासाठी १५० रुपये जास्त

कोल्हापूर : कोरोना संसर्गाच्या पहिल्या लाटेनंतर गणेशोत्सवाकरिता गणेशभक्त आपापल्या गावी आले आहेत. मात्र, त्यांना आपल्या गावी पोहोचण्यासाठी दीड ते दुप्पट जादा पैसे मोजावे लागले. एसटी बसेसच्या तुलनेत खासगी बसेसना प्रवाशांकडून मागणी अधिक आहे. त्यामुळे दरवाढ केली आहे. कोल्हापुरातून पुण्यासाठी जायचे असेल तर ६०० ते ७०० रुपये मोजावे लागत आहेत. यापूर्वी हाच दर ४५० ते ५५० रुपये इतका होता.

कोरोनाच्या सलग दोन लाटांमुळे गणेशोत्सवाकरिता भक्तांना आपल्या गावी येता आले नाही. त्यामुळे यंदाच्या गणेशोत्सवाला वेगळे महत्त्व आले. अनेक गणेशभक्तांनी खासगी बसेसचे आरक्षण करून गाव गाठले. त्याकरिता नियमित तिकिटापेक्षा दुप्पट पैसे मोजले. मागील आठवड्यापासून हे दर वाढले आहेत. अनेक खासगी वाहतूकदारांनी गणेशोत्सव अक्षरश: कॅश केला. गेले दीड वर्षे या वाहतूकदारांच्या बसेसना काम नव्हते. त्यामुळे ही मंडळी आर्थिक अरिष्टात अडकली होती. त्यात डिझेल दरवाढीमुळेही तिकीट दर परवडनासे झाले असल्याचे मत अनेक वाहतूकदारांनी व्यक्त केले. दरवाढीचा फटका सर्वसामान्यांना बसला.

या मार्गावर सर्वाधिक ट्रॅव्हल्स

कोल्हापूर - पुणे

कोल्हापूर - मुंबई

कोल्हापूर - सोलापूर

कोल्हापूर - लातूर

कोल्हापूर - औरंगाबाद

कोल्हापूर - नागपूर

कोल्हापूर - नाशिक

आधीचे दर सध्याचे दर

कोल्हापूर - पुणे ४५० ते ५५० ६०० ते ७००

कोल्हापूर - मुंबई ७०० ते ९०० १००० ते १२००

कोल्हापूर - सोलापूर २५०-३५० २५०- ४००

कोल्हापूर - नाशिक ७००-८०० ९०० -१०००

कोल्हापूर - औरंगाबाद ८०० ते ९०० १००० - १२००

कोल्हापूर - नागपूर १००० - १२०० १२०० ते १४००

दोन वर्षांनंतर बरे दिवस

गेल्या दीड वर्षांपासून खासगी बसवाहतूकदारांना अनेक समस्यांना सामाेरे जावे लागले आहे. कराच्या बोजामुळे हा व्यावसायिक दबला गेला आहे. वाढत्या डिझेल दरवाढीसह कोल्हापूर-पुणे-मुंबई-नागपूर या मार्गावर टोल आणि सरकारचे करांमुळे दरवाढीशिवाय पर्याय राहिलेला नाही.

- सतीशचंद्र कांबळे, अध्यक्ष, कोल्हापूर जिल्हा खासगी बस वाहतूकदार संघटना

प्रवाशांना फटका

गणेशोत्सवाच्या काळात खासगी बसेसची ही दरवाढ सर्वसामान्यांना परवडणारी नाही. त्यामुळे यावर आरटीओ अथवा तत्सम यंत्रणांचे नियंत्रण हवे. जेणेकरून सर्वसामान्यांना दिलासा मिळेल.

आशुतोष जाधव, प्रवासी

एसटीच्या तुलनेत ही भाडेवाढ जादाची आहे. आधीच कोरोनामुळे आम्ही मंडळी आर्थिक घाईला आलो आहोत. त्यामुळे खासगी बसेस वाहतूकदारांनीही भाडेवाढीचा फेरविचार करावा.

अजय मोरे, प्रवासी