इचलकरंजीत मोबाइल चोरणाऱ्या दोघांना अटक

इचलकरंजी : नागरिकांच्या हातातून हिसडा मारून मोबाइल लंपास करणाऱ्या दोघांना शिवाजीनगर पोलिसांनी अटक केली. राहुल विनोद पाथरवट (वय १९) व सुजित सूर्यकांत मळगे (२०, दोघे रा. साईट नं. १०२, आसरानगर) अशी त्यांची नावे आहेत. त्यांच्याकडून दोन मोबाइल व मोपेड असा एकूण ७३ हजार रुपयांचा मुद्देमाल जप्त केला.

याबाबत अधिक माहिती अशी, सायबर पोलीस ठाण्याकडून मिळालेल्या माहितीवरून शिवाजीनगर पोलिसांनी रेकॉर्डवरील आरोपी राहुल पाथरवट व सुजित मळगे या दोघांना ताब्यात घेऊन त्यांच्याकडे चौकशी केली. त्यामध्ये जुन्या बसस्थानक परिसरातील एक व पोलीस ठाण्यात दाखल असलेल्या एका गुन्ह्याची कबुली दिली. सुजित मळगे कोरोना पॉझिटिव्ह आल्याने त्याला कोविड केंद्रात उपचारासाठी दाखल केले असून, राहुल पाथरवट याची न्यायालयीन कोठडीत रवानगी केली आहे.