यादवनगर हल्लाप्रकरणी आणखी दोघे अटक

कोल्हापूर : यादवनगरात दोन गटांत झालेल्या सशस्त्र हाणामारीत राजरामपुरी पोलिसांनी रविवारी आणखी दोघांना अटक केली. शकील मेहबुब जमादार (वय २६), राजेश शेखर पवार (वय २६, दोघेही रा. यादवनगर) अशी अटक केलेल्या दोघांची नावे आहेत. यापूर्वी अटक केलेल्या सातजणांना न्यायालयाने दोन दिवसांची पोलीस कोठडी सुनावली. एकमेकांकडे पाहण्याच्या कारणांवरून दोन गटात शुक्रवारी रात्री सशस्त्र हल्ला झाला होता. याप्रकरणी दोन्हीही गटांतील पाचजण जखमी झाले होते. याप्रकरणी दोन्हीही गटांनी एकमेकांविरोधात तक्रार दिली होती.

पोलिसांनी दिलेली माहिती अशी की, यादवनगरातील अमन शेख हा आपल्या मित्रासोबत गप्पा मारत बसला होता. त्यावेळी प्रदीप जानकर व मित्र अनिकेत साळुंखे हे दुचाकीवरून तिथून जाताना एकमेकांकडे बघण्याच्या कारणांवरून आणि खुन्नस देण्यावरून वाद उफाळला. यातून दोन्हीही बाजूंनी १५ ते २० युवकांनी तलवार, चाकू आणि बांबूने केलेल्या हल्ल्यात पाचजण जखमी झाले. याप्रकरणी शनिवारी सात जणांना अटक केली, तर रविवारी आणखी दोघांना अटक केली.