उदगावला स्वतंत्र बसस्थानकाची अपेक्षा

शुभम गायकवाड / उदगाव : उदगाव (ता. शिरोळ) हे गाव सांगली-कोल्हापूर महामार्गालगत आहे. शासकीय कर्मचारी, खासगी कामगार, विद्यार्थी व इतर वाहतूक असल्याने कायमस्वरूपी गजबजलेला परिसर असलेले आत्ताचे बसस्थानक आहे. नेहमीचा रहदारीचा रस्ता असल्याने कित्येकदा या मार्गावर अपघात झाले आहेत. त्यामुळे गावासाठी स्वतंत्र बसस्थानक असावे, अशी मागणी आता जोर धरू लागली आहे.

सध्याचे बसस्थानक हे अगदीच तोकडे असून बसथांब्यासाठी खास जागा नाही. थांब्यासमोरच इतर खासगी वाहनेही उभी असतात. तेथूनच प्रवाशांची चढउतार होत असते. त्यामुळे अपघाताला निमंत्रण मिळते.

स्वतंत्र बसस्थानकाला मुख्य रस्त्यावरच हनुमान पाणीपुरवठ्यासमोर शासकीय मालकीची मोठी जागा उपलब्ध आहे. या ठिकाणी स्वतंत्र बसस्थानक होऊ शकते. तसे झाल्यास कोल्हापूर, इचलकरंजी, मिरज, सांगली येथून येणाऱ्या बसेससाठी थांबा मिळेल. त्यामुळे नागरिकांची उदगावला सर्व बसेसचा थांबा असावा, ही कायमची मागणी आपोआपच पूर्ण होणार आहे.

चौकट -

लांब पल्ल्याच्या बसेसचा नेहमीच अन्याय

उदगाव येथे एकही लांब पल्ल्याची बस थांबत नाही. शिवाय सांगली, कोल्हापूरला जाणाऱ्या लाल फलक असलेल्या बसेसही थांबत नाहीत. या प्रश्नावर अनेक वेळा आंदोलने झाली आहेत. प्रशासनाने लेखी पत्र देऊनही बसेस थांबत नसल्याने हा थांबा नेहमीच वादात राहिला आहे.

कोट -

उदगावला स्वतंत्र बसस्थानक व्हावे यासाठी परिवहन राज्यमंत्री सतेज पाटील यांना भेटून मागणी करणार आहोत. हनुमान पाणीपुरवठासमोर बसस्थानक झाल्यास अपघातांचे प्रमाण कमी होऊन प्रवासी, वाहतूकधारकांना शिस्त लागणार आहे. - सागर कदम, संस्थापक, ड्रीम फौंडेशन

फोटो - २६१२२०२०-जेएवाय-०३

फोटो ओळ - सध्या उदगाव बसथांब्यासमोर मुख्य रस्त्यावरच प्रवाशांची चढउतार होत असल्याने वाहतुकीची कोंडी निर्माण होत आहे; तर दुसऱ्या छायाचित्रात उदगाव-कोल्हापूर मुख्य रस्त्यालगत उपलब्ध असणारी जागा.