जिल्ह्यातील ६ लाख ३७ हजारजणांना लस

कोल्हापूर : देशभरातील ४५ वर्षांवरील सर्व नागरिकांना १ एप्रिलनंतर कोव्हिड प्रतिबंधक लस देण्याचा निर्णय केंद्र सरकारने घेतला आहे. याचा कोल्हापूर जिल्ह्यातील ६ लाख ३७ हजार नागरिकांना फायदा होणार आहे.

जानेवारीपासून कोल्हापूर जिल्ह्यात लसीकरणास प्रारंभ झाला. यामध्ये सुरुवातीला आरोग्य विभागातील डॉक्टर्स आणि आरोग्य कर्मचाऱ्यांना लस देण्यात आली. त्यानंतर फ्रंटलाईन वर्कर ज्यामध्ये जिल्हा परिषद, पंचायत समितीमधील कर्मचारी, पोलीस यांचा समावेश होता अशांना लस देण्यात सुरुवात झाली. त्यानंतर ४५ वर्षांवरील आजार असणाऱ्या आणि ६० वर्षांवरील सरसकट नागरिकांना लस देण्यास सुरुवातीही झाली.

परंतु कोरोनाची वाढती रुग्णसंख्या पाहता केंद्र शासनाने ४५ वर्षांवरील सरसकट सर्वच नागरिकांना लस देण्याचा निर्णय मंगळवारी जाहीर केला. १ एप्रिल २०२१ पासून याची अंमलबजावणी करण्यात येणार आहे. त्यानुसार कोल्हापूर जिल्ह्यात नागरी आणि ग्रामीण लोकसंख्या विचारात घेता ४५ वर्षांवरील ६ लाख ३७ हजार २७६ नागरिकांना या नव्या घोषणेनंतर लस देण्याचे नियोजन करावे लागणार आहे.

सध्या कोल्हापूर जिल्ह्यात १२३ शासकीय आरोग्य संस्थांमध्ये लसीकरण करण्यात येत असून, ३४ खासगी रूग्णालयांमध्ये सशुल्क लसीकरण करण्यासाठी परवानगी देण्यात आली आहे. बुधवारी ४८ हजार ५०० डोस जिल्ह्यात दाखल झाल्यामुळे आता जिल्ह्यात आणखी सहा दिवस पुरेल एवढा साठा आहे. मात्र आता १ एप्रिलनंतर ४५ वर्षांवरील नागरिकांना सरसकट लस देण्याचे नियोजन असल्याने साहजिकच डोसची आवक वाढवावी लागणार आहे.

चौकट

अ.नं. तालुका ४५ टक्क्यांवरील लसीकरणासाठी पात्र लोकसंख्या

१ आजरा १९,७७३

२ भुदरगड २४७२३

३ चंदगड ३०,७८२

४ गडहिंग्लज ३७,११५

५ गगनबावडा ५८८२

६ हातकणंगले १,३२८०६

७ कागल ४५,२७६

८ करवीर १,७०,६१६

९ पन्हाळा ४२६५२

१० राधानगरी ३२८३६

११ शाहूवाडी ३०,५२६

१२ शिरोळ ६४२८९

एकूण ६,३७,२७६

चौकट

आजार दाखवून लस घेणे आता बंद

लस घेण्याबाबत नागरिक सजग झाल्याने ४५ वर्षांवरील सरसकट नागरिक लस घेण्यासाठी इच्छुक होते. मात्र ४५ ते ५९ वयोगटातील केवळ मधुमेह, रक्तदाब आणि अन्य आजार असणाऱ्यांनाच लस देण्याची मुभा होती. त्यामुळे अनेकांनी आपल्याला आजार असल्याचे खोटेच नोंदवून लस घेतली होती. मात्र आता केंद्र सरकारने सरसकट परवानगीच दिल्याने खोटेपणा करावा लागणार नाही.

चौकट

१ लाख ५३ हजार जणांना जुने आजार

आरोग्य विभागाने २००१, २०११ च्या लोकसंख्येचा आधार घेऊन २०२१ ची संभाव्य लोकसंख्या काढली आहे. त्यातील ठराविक टक्केवारीनुसार ही ४५ वर्षांवरील नागरिकांची आकडेवारी काढण्यात आली आहे. यातील १ लाख ५३ जणांना जुने आजार असल्याचे गृहितक यातून मांडण्यात आले आहे. तर ६० वर्षांवरील नागरिक ५ लाख ९ हजार असल्याचे शासकीय आकडेवारी सांगते.