१२० आरोग्य केंद्रे, खासगी रुग्णालयात लसीकरण सुरू

लोकमत न्यूज नेटवर्क

कोल्हापूर : जिल्ह्यात कोरोना लसीकरणाचा तिसरा टप्पा सुरू झाला असून, याअंतर्गत ४५ वर्षांवरील व्याधीग्रस्त, ६० वर्षांवरील ज्येष्ठ असे ६ लाख ६१ हजार ९८४ नागरिकांना व आरोग्य कर्मचारी व फ्रंट लाईन वर्कर असे एकूण साडेसात लाख लोकांना १२० आरोग्य केंद्रे व खासगी रुग्णालयांतून लस देण्यात येणार आहे. त्यासाठी या नागरिकांनी कोवीन ॲपद्वारे नाव नोंदणी करावी व प्रशासनाच्या नियोजनानुसार टप्प्याटप्प्याने लस घ्यावी, असे आवाहन जिल्हाधिकारी दौलत देसाई यांनी मंगळवारी झालेल्या पत्रकार परिषदेत केले.

कोरोना लसीकरणाच्या तिसऱ्या टप्प्यातील नियोजनाबाबत आयोजित बैठकीत त्यांनी ही माहिती दिली. यावेळी आयुक्त कादंबरी बलकवडे, जिल्हा परिषदेचे मुख्य कार्यकारी अधिकारी संजयसिंह चव्हाण, जिल्हा परिषद अध्यक्ष बजरंग पाटील, जिल्हा आरोग्य अधिकारी डॉ. योगेश साळे, शल्यचिकित्सक अनिल माळी, शाहू वैद्यकीय महाविद्यालयाचे अधिष्ठाता एस. एस. माळी, निवासी उपजिल्हाधिकारी भाऊसाहेब गलांडे, पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव उपस्थित होते.

जिल्हाधिकारी म्हणाले, कोरोना काळात प्रशासनाने आयुष सर्व्हे केला होता, त्यानुसार व्याधीग्रस्त व ज्येष्ठांची आकडेवारी उपलब्ध झाली असून सर्व यादी आशा, अंगणवाडी सेविका व आरोग्य कर्मचारी यांना देण्यात येणार आहे. ते घरोघरी जाऊन ज्येष्ठांच्या ऑनलाईन बुकिंगसाठी मदत करतील. ग्रामसेवक, तलाठी, पोलीस पाटील, शिक्षक, कोतवाल व ग्रामपंचायत कर्मचारी जनजागृती करतील. प्रत्यक्ष केंद्रावर जाऊनदेखील लसीकरण करता येईल; मात्र गर्दी टाळण्यासाठी नागरिकांनी आधी ऑनलाईन नोंदणी करावी.

--

लसीकरणासाठी अपेक्षित लाभार्थी

६० वर्षांवरील व्यक्ती : ५ लाख ९ हजार -

४५ ते ५९ वयोगटातील व्याधीग्रस्त लाभार्थी : १ लाख ५२ हजार ९४८

विभाग : नोंदणीकृत लाभार्थी : लसीकरण झालेले लाभार्थी

आरोग्य कर्मचारी : ३८ हजार २५६ : २६ हजार ९६५

फ्रंट लाईन वर्कर : २९ हजार ८८९ : ८ हजार ९७५

एकूण लाभार्थी : ७ लाख ३१ हजार ३७३ : ३५ हजार ८३०

----

लोकप्रतिनिधींनी पुढे यावे

लसीकरणाबाबत कोणताही गैसरमज न बाळगता लोकांनी पुढे यावे. नागरिकांमध्ये लसीबाबत विश्वास वाढावा यासाठी ६० वर्षांवरील लोकप्रतिनिधी, गावागावांतील पदाधिकारी, प्रतिष्ठित नागरिक, राजकीय व सामाजिक संघटनांचे प्रतिनिधी, ज्येष्ठ नागरिक संघटनांच्या पदाधिकाऱ्यांनी लसीकरण करून घ्यावे, असे आवाहनही जिल्हाधिकारी देसाई यांनी केले.

----

व्याधीग्रस्तांसाठी प्रमाणपत्र आवश्यक

मधुमेह, ह्दयविकार, पॅरालिसीस, किडनीशी संबंधित आजार, स्टेरॉईड, कॅन्सर, रोगप्रतिकारकशक्ती कमी करणारे कोणतेही आजार अशा जवळपास २० व्याधींची नावं लसीकरण मोहिमेत घेण्यात आली असून, या नागरिकांच्या लसीकरणासाठी वैद्यकीय प्रमाणपत्र आवश्यक आहे. या नागरिकांनी मेडिकल प्रॅक्टिशनर्सकडून व्याधीचे प्रमाणपत्र घेऊन त्याची सॉफ्ट कॉपी ऑनलाईन नोंदणीसोबत जोडावी व लस घेण्यासाठी जाताना हे प्रमाणपत्र सोबत ठेवणे गरजेचे आहे.

---