Lok Sabha Election 2019 शिरोळमधून मताधिक्य कोणाला?

संदीप बावचे
लोकमत न्यूज नेटवर्क
शिरोळ : घरच्या मैदानावर खासदार राजू शेट्टी यांना शेवटपर्यंत जखडून ठेवण्याची खेळी शिवसेना-भाजप युतीच्या नेत्यांनी केली. शेतकऱ्यांना कर्जमुक्ती आणि शेतीमालाला दीडपट हमीभाव यासह सामान्यांना न्याय मिळाला पाहिजे, असे प्रश्न घेऊन खासदार शेट्टी निवडणुकीत उतरले होते. तर महायुतीने गेल्या पाच वर्षांत केलेली विकासकामे हा मुद्दा घेऊन खा. शेट्टी यांच्यावर टीकेची झोड उठवून कोणत्याही परिस्थिती खा. शेट्टी यांना हॅट्ट्रिक करू द्यायची नाही, यासाठीही कंबर कसली होती. एकूणच शिरोळ तालुक्यातून मताधिक्याची बाजी महाआघाडी की महायुती मारणार, याबाबत उत्सुकता लागून राहिली आहे.
सन २०१४ च्या लोकसभा निवडणूकीत शिरोळ तालुक्यातून ७६ टक्के मतदान झाले होते. यंदाच्या निवडणुकीत ७३ टक्के मतदान झाले. तीन टक्क्यांनी मतदानाचा टक्का घसरला असला तरी गतनिवडणुकीपेक्षा १३ हजार अधिक मतदान झाले आहे. गेल्या दोन निवडणुकीत तालुक्यातून शेट्टी यांना लीड मिळाले आहे. तालुक्यात शेट्टी यांना विरोधकांनी शेवटपर्यंत घेरण्याचा प्रयत्न केला. ऊस व दूध आंदोलनातून शेतकऱ्यांची फसवणूक झाल्याचा आरोप विरोधकांनी केला. तर तालुक्यात खा. शेट्टी यांनी घेतलेल्या सभा लक्षवेधी ठरल्या. पंतप्रधान नरेंद्र मोदी, मुख्यमंत्री देवेंद्र फडणवीस यांना लक्ष करून विरोधकांना प्रत्युत्तर दिले. धैर्यशील माने यांच्यासाठी शिवसेना-भाजपकडून गुरुदत्त शुगर्सचे अध्यक्ष माधवराव घाटगे, शिवसेनेचे आमदार उल्हास पाटील यांच्या माध्यमातून प्रचार यंत्रणा राबविली. तर खा. शेट्टी यांच्या बाजूने स्वाभिमानीसह काँग्रेसचे गणपतराव पाटील, राष्ट्रवादीचे डॉ. राजेंद्र पाटील-यड्रावकर, छत्रपती ग्रुप यासह घटक पक्षांनी प्रचार यंत्रणा राबविली. निवडणुकीत जातीय समीकरणाचा मुद्दा अधिक गाजला. वंचित आघाडीला मिळणाºया मतावरही विजयाची गणिते अवलंबून आहेत. या निवडणुकीत एकूणच ही निवडणूक नेत्यांच्या प्रतिष्ठेची बनली असून, लोकसभेच्या निकालावरच विधानसभेचे चित्र राहणार आहे.
मतदारसंघातील सभा
या मतदारसंघात खा. शेट्टी यांच्यासाठी राष्ट्रवादीचे माजी उपमुख्यमंत्री छगन भुजबळ, अभिनेते प्रकाश राज, आमदार विश्वजित कदम, माजी मंत्री हसन मुश्रीफ, रविकांत तुपकर यांनी, तर धैर्यशील माने यांच्यासाठी पालकमंत्री चंद्रकांत पाटील, कृषी राज्य मंत्री सदाभाऊ खोत, लक्ष्मण वडले यांनी सभा घेतल्या. खा. शेट्टींच्या प्रचारासाठी राष्ट्रवादी पक्षाचे अध्यक्ष शरद पवार यांनीही जयसिंगपूर येथे भेट दिली होती. प्रचाराच्या शेवटच्या दिवशी पदयात्रा व मोटारसायकल रॅलीने शक्ती प्रदर्शन करण्यात आले.