बसखाली आत्महत्या केलली महिला पोहाळेची

कोल्हापूर : येथील स्टेशन रोडवर सोमवारी सकाळी एस.टी. बसखाली स्वत:ला झोकून देऊन आत्महत्या केलल्या महिलेची मंगळवारी सायंकाळी ओळख पटली. सुमन जालिंदर मोरे (५६, रा. पोहाळे, ता. पन्हाळा) असे त्यांचे नाव आहे. डोळे तपासणीसाठी रुग्णालयात जाते, असे सांगून त्या घरातून बाहेर पडल्या होत्या, असे त्यांच्या पतीने शाहूपुरी पोलीस ठाण्यात सांगितले.

पोलिसांनी दिलेली माहिती अशी की, सोमवारी सकाळी स्टेशन रोडवर ग्रामीण पेहरावातील एका महिलेने धावत्या एस.टी. बसखाली उडी घेऊन आत्महत्या केली होती. दिवसभर त्या महिलेची ओळख पटली नव्हती. वृत्तपत्रात आलेल्या छायाचित्राच्या आधारे मंगळवारी सायंकाळी त्यांची ओळख पटली. तिच्या पतीने मृतदेह पाहिल्यानंतर तो ओळखला. त्यांना डोळ्याचा विकार असल्याने त्या डोळे तपासणीसाठी कोल्हापूरला सरकारी रुग्णालयात जाते, असे सांगून त्या घरातून सोमवारी सकाळी बाहेर पडल्या होत्या, असे त्याचे पती जालिंदर मोरे यांनी पोलिसांना सांगितले. मोरे हे शेतकरी कुटुंबीयातील असून मृत सुमन मोरे यांच्या पश्चात फक्त पतीच घरी असल्याचे त्यांनी सांगितले.